20 قىركۇيەك, سەنبى كۇنى ەلوردادا دۇنيەجۇزىلىك تازالىق كۇنىنە ارنالعان «تازا قازاقستان. استانا – تازالىق پەن تارتىپتىڭ ۇلگىسى» اتتى ەكولوگييالىق اكتسييا وتەدى. شارا بارىسىندا قالا اۋماعى قوقىستان تازارتىلادى, ساياباقتار, گۇلزارلار مەن اۋلالار رەتكە كەلتىرىلەدى. سونىمەن قاتار ساۋدا ورتالىقتارىنىڭ, تاماقتانۋ ورىندارىنىڭ جانە تۇرلى ۇيىمداردىڭ اۋماقتارى اباتتاندىرىلادى, دەپ حابارلايدى Shalqar.kz.

سەنبىلىكتىڭ ەڭ باستى ەرەكشەلىگى – قالاداعى التى اۋداندا اعاش وتىرعىزۋ جوسپارلانىپ وتىر. وسىلايشا, تۇرعىندار تەك قوقىس جيناپ قانا قويماي, جاسىل بەلدەۋدىڭ ۇلعايۋىنا دا ۇلەس قوسپاق.

اكىمدىك شاعىن جانە ورتا بيزنەس وكىلدەرىن, تۇرعىن ۇي باسقارمالارىن, ەرىكتىلەر مەن بەلسەندى ازاماتتاردى سەنبىلىككە قاتىسۋعا شاقىرادى. ۇيىمداستىرۋشىلاردىڭ ايتۋىنشا, اكتسييانىڭ باستى ماقساتى – قالا تۇرعىندارىنا تازالىقتىڭ ماڭىزىن تۇسىندىرىپ, ەكولوگييالىق مادەنيەتتى دامىتۋ.

ەكواكتسييا ساعات 10:00-دە باستالىپ, كەز كەلگەن تۇرعىن وز اۋدانىن كوركەيتۋگە ۇلەس قوسا الادى.