Қазақстан мектептерінде «Адал азамат» бағдарламасының құндылықтарын насихаттайтын бірыңғай безендіру үлгісі енгізіледі. Бұл туралы Оқу-ағарту министрлігінің Тәрбие жұмысы және қосымша білім беру департаментінің директоры Ерлан Қалмақов ОКҚ брифингінде мәлімдеді, деп хабарлайды Shalqar.kz.

Жаңа дизайн-код аясында әр пән кабинеті оқушылардың жас ерекшелігіне сай безендіріліп, күнделікті жақсы әдеттерді қалыптастыратын суреттер мен нақыл сөздер қолданылады. Ал мектептің ортақ кеңістіктерінде еліміздің табиғи көрікті жерлерінің, тарихи тұлғалардың бейнелері мен ойшылдардың қанатты сөздері орналастырылады.

«Адал азамат» бағдарламасының алты негізгі құндылығына негізделген бұл брендбук мектептерге өз ерекшеліктеріне қарай үлгілерді таңдауға мүмкіндік береді. Құжат үнемі толықтырылып, заман талабына сай жетілдіріліп отырады.

Жаңа үлгі кезең-кезеңімен енгізіледі: алдымен жаңадан салынған мектептерде, кейін реновациядан өтетін 1300 білім ордасында, соңғы кезеңде – күрделі жөндеуден өтетін қалған оқу орындарында қолданысқа енгізіледі.

Айта кетейік, биылғы 1 қыркүйектен бастап барлық мектепте жаңа тәрбие бағдарламасы іске қосылған болатын.