قازاقستان مەكتەپتەرىندە «ادال ازامات» باعدارلاماسىنىڭ قۇندىلىقتارىن ناسيحاتتايتىن بىرىڭعاي بەزەندىرۋ ۇلگىسى ەنگىزىلەدى. بۇل تۋرالى وقۋ-اعارتۋ مينيسترلىگىنىڭ تاربيە جۇمىسى جانە قوسىمشا بىلىم بەرۋ دەپارتامەنتىنىڭ ديرەكتورى ەرلان قالماقوۆ وكق بريفينگىندە مالىمدەدى, دەپ حابارلايدى Shalqar.kz.

جاڭا ديزاين-كود اياسىندا ار پان كابينەتى وقۋشىلاردىڭ جاس ەرەكشەلىگىنە ساي بەزەندىرىلىپ, كۇندەلىكتى جاقسى ادەتتەردى قالىپتاستىراتىن سۋرەتتەر مەن ناقىل سوزدەر قولدانىلادى. ال مەكتەپتىڭ ورتاق كەڭىستىكتەرىندە ەلىمىزدىڭ تابيعي كورىكتى جەرلەرىنىڭ, تاريحي تۇلعالاردىڭ بەينەلەرى مەن ويشىلداردىڭ قاناتتى سوزدەرى ورنالاستىرىلادى.

«ادال ازامات» باعدارلاماسىنىڭ التى نەگىزگى قۇندىلىعىنا نەگىزدەلگەن بۇل برەندبۋك مەكتەپتەرگە وز ەرەكشەلىكتەرىنە قاراي ۇلگىلەردى تاڭداۋعا مۇمكىندىك بەرەدى. قۇجات ۇنەمى تولىقتىرىلىپ, زامان تالابىنا ساي جەتىلدىرىلىپ وتىرادى.

جاڭا ۇلگى كەزەڭ-كەزەڭىمەن ەنگىزىلەدى: الدىمەن جاڭادان سالىنعان مەكتەپتەردە, كەيىن رەنوۆاتسييادان وتەتىن 1300 بىلىم ورداسىندا, سوڭعى كەزەڭدە – كۇردەلى جوندەۋدەن وتەتىن قالعان وقۋ ورىندارىندا قولدانىسقا ەنگىزىلەدى.

ايتا كەتەيىك, بيىلعى 1 قىركۇيەكتەن باستاپ بارلىق مەكتەپتە جاڭا تاربيە باعدارلاماسى ىسكە قوسىلعان بولاتىن.