Қазақстанда мемлекеттен әлеуметтік қолдау алатын азаматтардың нақты санаттары бекітілді. Тиісті бұйрыққа премьер-министрдің орынбасары – Ұлттық экономика министрі Серік Жұманғарин қол қойды, деп хабарлайды Shalqar.kz.

Жаңа Салық кодексі аясында дайындалған бұл құжат 2026 жылдың 1 қаңтарынан бастап күшіне енеді. Әлеуметтік көмекке құқығы бар азаматтар қатарына мынадай санаттар кіреді:

 1. арнаулы мемлекеттік жәрдемақы алушылар;

 2. мемлекеттік әлеуметтік жәрдемақы алушылар;

 3. арнаулы әлеуметтік қызмет алушылар;

 4. зейнетақы төлемдерін алатын мүгедектігі бар адамдар;

 5. 18 жасқа толмаған жетім балалар және ата-анасының қамқорлығынсыз қалғандар;

 6. атаулы әлеуметтік көмек алушылар;

 7. Денсаулық сақтау министрінің 2020 жылғы №ҚР ДСМ-108/2020 бұйрығында көрсетілген әлеуметтік маңызы бар аурулары бар тұлғалар;

 8. айналадағылар үшін қауіп төндіретін аурулар тізіміне енгізілген сырқаты бар адамдар (№ҚР ДСМ-162/2020 бұйрығы);

 9. екі айдан астам уақытқа еңбекке жарамсыздық мерзімі белгіленген аурулары бар тұлғалар (№1033 бұйрық);

 10. созылмалы аурулардың ауыр түрлерімен ауыратын азаматтар (№ҚР ДСМ-14 бұйрығы).

Айта кетейік, бұған дейін Президент Қасым-Жомарт Тоқаев 2026 жылдан бастап қолданысқа енгізілетін жаңа Салық кодексіне қол қойған болатын.