قازاقستاندا ۇلتتىق بىرىڭعاي تەستىلەۋ جۇيەسى الداعى جىلدارى تۇبەگەيلى جاڭارتىلادى. عىلىم جانە جوعارى بىلىم مينيسترى ساياسات نۇربەك جاڭا ۇلگىنىڭ كەزەڭ-كەزەڭىمەن قالاي ەنگىزىلەتىنىن جانە ونىڭ تۇلەكتەرگە بەرەتىن مۇمكىندىكتەرىن باياندادى, دەپ حابارلايدى Shalqar.kz.

مينيستر وزگەرىستەردىڭ بىردەن ەمەس, جوسپارلى تۇردە جۇزەگە اساتىنىن اتاپ وتتى.

“بىرىنشىدەن, 2026 جىلى ەشقانداي وزگەرىستەر بولمايدى. بۇل ماسەلە الەۋمەتتىك تۇرعىدان وتە سەزىمتال, سوندىقتان ونى بىردەن وزگەرتۋگە بولمايدى. ال نە بولادى? بىرىنشىدەن: بىز قازىر بەس جىلدىق, ۇزاق مەرزىمدى كەزەڭ-كەزەڭىمەن ەنگىزىلەتىن جوسپار ازىرلەپ جاتىرمىز. بىرىنشى كەزەڭدە تەستولوگتارىمىزدان قۇرالعان توپ الەمگە تانىمال ETS كومپانيياسىندا وقۋدان وتەدى. بىزدىڭ بىرىنشى قىزمەتكەرىمىز دال قازىر كومپانييانىڭ پرينستونداعى كامپۋسىندا بىلىم الۋدا”, – دەدى ساياسات نۇربەك.

ونىڭ ايتۋىنشا, SAT, TOEFL, LGR سيياقتى بەدەلدى حالىقارالىق ەمتيحانداردى دايىندايتىن ETS (Educational Testing Service) كومپانيياسى جاڭا ادىستەمەلىك بازانى قۇرۋعا كومەكتەسەدى.

“ەكىنشى كەزەڭ, تەستولوگتارىمىزدى وقىتقاننان كەيىن ETS كومپانيياسىنىڭ كومەگىمەن ادىستەمەلىك بازا ازىرلەنەدى. بۇل ادىستەمە نەگە كەرەك? قازىرگى ۇبت كوپتەگەن شەتەلدىك ۋنيۆەرسيتەتتەر تاراپىنان حالىقارالىق دەڭگەيدە سەرتيفيكاتتالعان تەست رەتىندە مويىندالمايدى. بىز ۇبت-نى حالىقارالىق دەڭگەيدەگى, ياعني جەتەكشى شەتەلدىك ۋنيۆەرسيتەتتەرگە قابىلداۋ ۇشىن قولدانىلاتىن placement test فورماتىنا اينالدىرعىمىز كەلەدى”, – دەدى مينيستر.

جاڭا فورمات ەكى ماقساتتى كوزدەيدى: بىلىم ساپاسىن ادىل باعالاۋ جانە ۇبت-نىڭ حالىقارالىق دارەجەدە مويىندالۋىن قامتاماسىز ەتۋ.

“ەگەر بارىن دۇرىس جاساساق, بىزدىڭ تۇلەكتەرىمىز ۇبت سەرتيفيكاتى ارقىلى الەمدەگى كەز كەلگەن ۋنيۆەرسيتەتكە تۇسە الادى”, – دەيدى ساياسات نۇربەك.

سونداي-اق مينيستر جاڭا تەست ازىرلەۋ بارىسىندا بۇعان دەيىنگى سىن-پىكىرلەر ەسكەرىلەتىنىن, ال باعالاۋ جۇيەسى بىلىممەن قاتار سىني ويلاۋ مەن پسيحولوگييالىق ەرەكشەلىكتەردى دە قامتيتىنىن قوستى.