قازاقستاندا قابىلداناتىن جاڭا سالىق كودەكسى اياسىندا ارنايى سالىق رەجيمىن (اسر) قولدانۋعا رۇقسات ەتىلەتىن جانە تىيىم سالىناتىن قىزمەت تۇرلەرىنىڭ تىزىمى قوعام تالقىسىنا ۇسىنىلدى. بۇل تۋرالى ۇلتتىق ەكونوميكا مينيسترلىگى حابارلادى, دەپ حابارلايدى Shalqar.kz.

جاڭا قۇجاتقا سايكەس, جەڭىلدەتىلگەن دەكلاراتسييا نەگىزىندە جۇمىس ىستەيتىن اسر ەكى تۇرلى جۇيەنىڭ – جەڭىلدەتىلگەن دەكلاراتسييا مەن بولشەك سالىقتىڭ ەلەمەنتتەرىن بىرىكتىرەدى. الايدا بۇل رەجيمدى بارلىق كاسىپكەرلەر پايدالانا المايدى. مىسالى, جىلدىق كىرىسى 600 مىڭ اەك-تەن (شامامەن 2,36 ملرد تەڭگە) اساتىن بيزنەس سۋبъەكتىلەرى, باسقا كومپانييالاردىڭ ۇلەسى 25%-دان جوعارى زاڭدى تۇلعالار, قۇرىلتايشىلارى باسقا اسر قولداناتىن ۇيىمدارعا قاتىسى بار كاسىپورىندار, كوممەرتسييالىق ەمەس ۇيىمدار جانە «استانا حاب» پەن اەا قاتىسۋشىلارى جەڭىلدەتىلگەن جۇيەدەن تىس قالادى. سونداي-اق بىرلەسكەن قىزمەت شارتى نەگىزىندە جۇمىس ىستەيتىن سالىق تولەۋشىلەرگە دە بۇل رەجيم قولجەتىمسىز بولادى.

تىيىم سالىنعان سالالاردىڭ قاتارىندا ىرى وندىرىس پەن جوعارى كىرىس اكەلەتىن باعىتتار بار: وڭدەۋ ونەركاسىبى, قۇرىلىس, جەر قويناۋىن پايدالانۋ, تابيعي مونوپولييا سۋبъەكتىلەرىنىڭ قىزمەتى, كوتەرمە ساۋدا, 2000 شارشى مەتردەن اساتىن الاڭداعى بولشەك ساۋدا, تەلەكوممۋنيكاتسييا, ينتەرنەت پەن IT, قارجى جانە ساقتاندىرۋ سەكتورى, كاسىبي اگەنتتىك جانە كونسالتينگ, عىلىمي زەرتتەۋلەر جانە تاعى باسقالار.

سونىمەن قاتار مينيسترلىك 300-گە جۋىق قىزمەت تۇرىنە جەڭىلدەتىلگەن رەجيمدى ساقتاپ قالۋدى ۇسىنىپ وتىر. ونىڭ ىشىندە 2000 شارشى مەترگە دەيىنگى بولشەك ساۋدا (دارىحانالاردى قوسا), ينتەرنەت نەمەسە پوشتا ارقىلى تاپسىرىسپەن ساۋدا جاساۋ, جەلىلىك ماركەتينگ, دۇكەننەن تىس ساتىلىم, تۇرعىن ۇيدى جالعا بەرۋ, تاماقتانۋ جانە كولىك قىزمەتتەرى, جەڭىل جانە تاماق ونەركاسىبى, جولاۋشى تاسىمالى, مەكتەپكە دەيىنگى جانە قوسىمشا بىلىم بەرۋ, مەديتسينالىق جانە الەۋمەتتىك قىزمەتتەر, تۇرمىستىق جانە قۇرىلىس جۇمىستارى, شىعارماشىلىق يندۋسترييا, مادەنيەت, سپورت, سونداي-اق اۋىل شارۋاشىلىعى بار.

جوسپار بويىنشا, جەڭىلدەتىلگەن سالىق رەجيمى بارلىق سالىق تولەۋشىلەردىڭ شامامەن 70%-ىنا قولجەتىمدى بولىپ قالادى. ال ىرى بيزنەس وكىلدەرى جالپىعا بىردەي بەلگىلەنگەن تارتىپكە كوشەدى. بۇل رەتتە جىلدىق اينالىمى 40 ميلليون تەڭگەگە دەيىنگى كاسىپكەرلەر ققس تولەۋدەن بوساتىلادى.

ۇكىمەتتىك قاۋلى ارقىلى جەكە كاسىپكەرلىك اشپاعان, جالدامالى قىزمەتكەرى جوق جانە اي سايىنعى كىرىسى 300 اەك-تەن اسپايتىن وزىن-وزى جۇمىسپەن قامتىعان ازاماتتارعا ارنالعان رۇقسات ەتىلگەن قىزمەت تۇرلەرىنىڭ بولەك تىزىمى بەكىتىلمەك. بۇل ساناتقا اياق كيىم جوندەۋ, تاكسي, سۇلۋلىق سالوندارى, تۇرمىستىق تاۋار جوندەۋ, فوتوسۋرەت قىزمەتى, مادەنيەت جانە سپورت سالاسىنداعى وقىتۋ, تۇرعىن ۇيدى جيناۋ, قۇرىلىسقا قاتىستى شاعىن جۇمىستار جانە باسقا دا جەكە قىزمەت تۇرلەرى كىرەدى.