Қазақстанда ғасырдан астам ғұмыр кешкен азаматтардың саны 448-ге жетті. Олардың ішінде ең қарт қазақстандық – Ұлытау облысының тұрғыны, ол жуырда 115 жасқа толған мерейтойын атап өтті, деп хабарлайды Shalqar.kz.

Ұзақ жасаушылардың көбі Алматы қаласында тұрады. Мұнда 100 жастағы және одан асқан 58 тұрғын бар. Екінші орында – Түркістан облысы (53 адам), ал үшінші орында Алматы облысы (37 адам).

Ең қарттардың алғашқы үштігіне 115 жасқа келген Ұлытау облысының тұрғыны, 113 жасар Павлодар облысының қариясы және 110 жасқа жеткен Жамбыл облысының тұрғыны кірді.

Айта кетейік, 1 қазан – Халықаралық қарттар күні. Бұл мерекені Біріккен Ұлттар Ұйымы 1990 жылы жариялаған болатын. Оның басты мақсаты – қарт жандардың қоғам мен мемлекет алдындағы еңбегін мойындау, олардың өмір сүру сапасын арттыруға және қажеттіліктеріне назар аудару.