قازاقستاندا عاسىردان استام عۇمىر كەشكەن ازاماتتاردىڭ سانى 448-گە جەتتى. ولاردىڭ ىشىندە ەڭ قارت قازاقستاندىق – ۇلىتاۋ وبلىسىنىڭ تۇرعىنى, ول جۋىردا 115 جاسقا تولعان مەرەيتويىن اتاپ وتتى, دەپ حابارلايدى Shalqar.kz.

ۇزاق جاساۋشىلاردىڭ كوبى الماتى قالاسىندا تۇرادى. مۇندا 100 جاستاعى جانە ودان اسقان 58 تۇرعىن بار. ەكىنشى ورىندا – تۇركىستان وبلىسى (53 ادام), ال ۇشىنشى ورىندا الماتى وبلىسى (37 ادام).

ەڭ قارتتاردىڭ العاشقى ۇشتىگىنە 115 جاسقا كەلگەن ۇلىتاۋ وبلىسىنىڭ تۇرعىنى, 113 جاسار پاۆلودار وبلىسىنىڭ قاريياسى جانە 110 جاسقا جەتكەن جامبىل وبلىسىنىڭ تۇرعىنى كىردى.

ايتا كەتەيىك, 1 قازان – حالىقارالىق قارتتار كۇنى. بۇل مەرەكەنى بىرىككەن ۇلتتار ۇيىمى 1990 جىلى جارييالاعان بولاتىن. ونىڭ باستى ماقساتى – قارت جانداردىڭ قوعام مەن مەملەكەت الدىنداعى ەڭبەگىن مويىنداۋ, ولاردىڭ ومىر سۇرۋ ساپاسىن ارتتىرۋعا جانە قاجەتتىلىكتەرىنە نازار اۋدارۋ.