بۇگىن ماجىلىستىڭ جالپى وتىرىسىندا دەپۋتاتتار جاڭا قۇرىلىس كودەكسىنىڭ جوباسىن تالقىلاپ, قۇرىلىس نىساندارىنىڭ ەڭ تومەنگى كەپىلدىك مەرزىمىن ەكى جىلدان بەس جىلعا دەيىن ۇلعايتۋ نورماسىن ماقۇلدادى, دەپ حابارلايدى Shalqar.kz.

بۇل شارا قولدانىلاتىن قۇرىلىس ماتەريالدارىنىڭ ساپاسىن, جوبانى ازىرلەۋ پروتسەسىن, تاپسىرىس بەرۋشى مەن مەردىگەردىڭ جاۋاپكەرشىلىگىن جاقسارتىپ, تۇتاستاي العاندا سالىنعان عيماراتتاردىڭ ونىمدىلىگىن ارتتىرادى.

بۇل رەتتە دەپۋتاتتار قۇرىلىمعا, شاتىرعا, قاسبەتكە بولەك ون جىل كەپىلدىك مەرزىمىن بەلگىلەۋدى ۇسىنىپ وتىر. بۇل ۇسىنىس ەكىنشى وقىلىمعا دەيىن قاراستىرىلادى.

سونداي-اق قۇرىلىستى جوسپارلاۋدا سەيسميكالىق ايماقتارعا بولۋ كارتالارى قولدانىلادى.

بۇل قۇرىلىستى جوسپارلاۋ كەزىندە بارىنشا قاۋىپسىز شەشىمدەر قابىلداۋعا, تابيعي اپاتتاردان بولاتىن ىقتيمال زالالدى ازايتۋعا مۇمكىندىك بەرەدى.

اتالعان كارتالار تەك سەيسميكالىق قاۋىپتىلىك دەڭگەيىن عانا ەمەس, گيدروگەولوگييالىق جانە ناقتى ايماقتارداعى توپىراق جاعدايلارىن ەسكەرەدى. بۇل مىقتى ىرگەتاس, جەر سىلكىنىسىنەن قورعاۋ سىندى ارنايى ينجەنەرلىك شەشىمدەردى قولدانۋ ارقىلى قاۋىپ-قاتەر بار جەرلەردە قۇرىلىس سالۋعا مۇمكىندىك بەرەدى.

سونىمەن قاتار زاڭدا ارنايى رەتتەۋگە جاتاتىن سالالاردى انىقتاۋ مەحانيزمى ەنگىزىلەدى. بۇل ايماقتار ۇشىن ارنايى ەرەجەلەر بەلگىلەنگەن. اسا قاۋىپتى ايماقتاردا تۇرعىن ۇيلەر سالۋعا تىيىم سالىنادى, ال باسقالارىندا كونسترۋكتيۆتى شەشىمدەر مەن ينجەنەرلىك قورعانىس قولدانۋ مىندەتتى بولادى.

بۇل شارالار قۇرىلىس قاۋىپسىزدىگىن ارتتىرۋعا جانە ازاماتتاردىڭ ومىرى مەن دەنساۋلىعىن ساقتاۋ ماقساتىندا جۇزەگە اسىرىلدى.