مەملەكەت باسشىسى قاسىم-جومارت توقاەۆ پارلامەنتتىك رەفورما جونىندەگى جۇمىس توبىنىڭ العاشقى وتىرىسىندا كونستيتۋتسيياعا وزگەرىس ەنگىزەتىنىن ايتتى, دەپ حابارلايدى Shalqar.kz اقورداعا سىلتەمە جاساپ.

پرەزيدەنتتىڭ ايتۋىنشا, پارلامەنتتىك رەفورما – اسا كۇردەلى ارى جاۋاپتى جۇمىس. ول بۇل ۇدەرىستە اسىعىستىققا جول بەرۋگە بولمايتىنىن اتاپ وتتى.

«مەملەكەت باسشىسى رەتىندە مەن ۇشىن پارلامەنت – ەلىمىزدەگى ساياسي جۇيەنىڭ نەگىزگى تىرەگى. سوندىقتان الدىمەن كونستيتۋتسيياعا بىرقاتار وزگەرىس ەنگىزۋ قاجەت بولادى. 

نەگىزگى زاڭنىڭ 40-قا جۋىق بابى وزگەرەدى. سودان سوڭ كەم دەگەندە 10 كونستيتۋتسييالىق زاڭعا جانە 50-دەن استام كودەكس پەن زاڭعا تۇزەتۋ ەنگىزۋ كەرەك بولادى. مۇنى جاڭا كونستيتۋتسييا قابىلداۋمەن تەڭ كەلەتىن ىس دەۋگە بولادى. 

ارينە, بۇل جۇمىستىڭ بارىن تابان استىندا, بىر ساتتە جۇزەگە اسىرۋ مۇمكىن ەمەس. تىڭعىلىقتى دايىندىق كەرەك. 

سوندىقتان الداعى رەفورمانىڭ كەيبىر كونتسەپتۋالدى تۇستارىنا قاتىستى وي-پىكىرىمدى بىلدىرگىم كەلەدى», – دەدى پرەزيدەنت.

مەملەكەت باسشىسى سونداي-اق الداعى رەفورما كەزەڭ-كەزەڭىمەن جۇزەگە اساتىنىن جانە ونىڭ ەلدىڭ ساياسي جۇيەسىن جاڭعىرتۋدىڭ قيسىندى جالعاسى بولاتىنىن ايتتى.

«بىرىنشىدەن, بىز بارلىق رەفورمانى تەك ەۆوليۋتسييالىق جولمەن جۇرگىزەمىز. ياعني ازاماتتاردىڭ سۇرانىسى, تول ەرەكشەلىگىمىز بەن ەلىمىزدىڭ تۇپكى مۇددەسى ەسكەرىلەدى.

پارلامەنتتىك رەفورما كەزەڭ-كەزەڭىمەن ىسكە اسىرىلىپ كەلە جاتقان اۋقىمدى ساياسي جاڭعىرۋدىڭ قيسىنىنا ساي كەلەدى.

ەستەرىڭىزدە بولسا, ساياسي رەفورمالاردىڭ تورت پاكەتى اياسىندا پارلامەنتتىك وپپوزيتسييا تۋرالى نورما بەكىتىلگەن ەدى. وندا وكىلدەرى از پارتيياعا ماجىلىستىڭ تۇراقتى كوميتەتتەرىنىڭ بىرىندە توراعالىق لاۋازىم اتقارۋ جانە پارلامەنتتىك تىڭداۋ وتكىزۋ تۋرالى باستاما كوتەرۋ قۇقىعىنا كەپىلدىك بەرىلدى.

ەسكە سالايىق, قاسىم-جومارت توقاەۆ 8 قىركۇيەكتەگى حالىققا جولداۋىندا قازاقستاندا بىر پالاتالى پارلامەنت قۇرۋ مۇمكىندىگىن اتاپ وتكەن ەدى. ونىڭ ايتۋىنشا, ساياسي رەفورمالار قوعامنىڭ ناقتى سۇرانىسىنا ساي كەزەڭ-كەزەڭىمەن جۇزەگە اسىرىلادى.