استانادا اقىلى اۆتوتۇراقتار ۇشىن تولەم جۇيەسى وزگەرەدى. جاڭا ەرەجەگە سايكەس, كولىكتى بىرنەشە مينۋتقا قويساڭىز, تولىق بىر ساعاتتىڭ قۇنىن تولەمەيسىز. تەك ناقتى تۇرعان ۋاقىتىنا اقشا الىناتىن بولادى, دەپ حابارلايدى, Shalqar.kz.

جاڭا ەرەجە ازىرگە كۇشىنە ەنگەن جوق. سەبەبى قالادا اۆتوتۇراققا قىزمەت كورسەتىپ وتىرعان جەكە كومپانييامەن جاسالعان كەلىسىمشارت الى بۇزىلماعان. تەك سول تولىق توقتاعان سوڭ عانا, مينۋتپەن تولەم جۇيەسى رەسمي تۇردە ىسكە قوسىلادى.

بۇل جاڭاشىلدىق جۇرگىزۋشىلەر ۇشىن وتە تيىمدى دەپ وتىر جاۋاپتىلار. قازىر اكىمدىك قاجەتتى وزگەرىستەردى زاڭ جۇزىندە راسىمدەپ, جاڭا جۇيەگە تەحنيكالىق دايىندىعىن جۇرگىزىپ جاتىر.

سونىمەن قاتار بەينەباقىلاۋ جانە كولىك نومىرىن تانۋ قۇرىلعىلارى دا ورناتىلادى دەپ جوسپارلانعان.

"جابىق تۇراقتار ۇشىن العاشقى 15 مينۋت تەگىن بولادى (جولاۋشىنى الىپ كەتۋ نەمەسە قىسقا مەرزىمگە كىرۋ ۇشىن). ەگەر جۇرگىزۋشى تۇراقتا 15 مينۋتتان ارتىق تۇرسا, تولەم ساعاتىنا 300 تەڭگە مولشەرىندە الىنادى. اشىق (كوشە بويىنداعى) تۇراقتار ۇشىن تاريف وزگەرىسسىز قالادى جانە ساعاتىنا 100 تەڭگە مولشەرىندە بەلگىلەنگەن", - دەيدى جول قوزعالىسىن ۇيىمداستىرۋ ورتالىعى ديرەكتورىنىڭ ورىنباسارى رۋسلان ومىربەكۇلى.