قازاقستان ۇكىمەتى كاسىپكەرلىكتى قولداۋ مەن سالىق ساياساتىنا قاتىستى شەشىمدەر قابىلدادى, دەپ حابارلايدى مينيسترلەر كابينەتىنىڭ باسپاسوز قىزمەتىنە سىلتەمە جاساعان Shalqar.kz.

"جاڭا سالىق كودەكسىنىڭ شاعىن جانە ورتا بيزنەس قىزمەتىنە تەرىس اسەرىن ازايتۋ ماقساتىندا وڭايلاتىلعان دەكلاراتسييا نەگىزىندەگى ارنايى سالىق رەجيمىن قولدانۋعا سالىناتىن باسى ارتىق شەكتەۋلەردى الىپ تاستاۋ تۋرالى شەشىم قابىلداندى. تىيىم سالىنعان تىزىمدە, قولدانىستاعى زاڭناماداعىداي, تەك 44 قىزمەت تۇرى ساقتالادى.

ودان بولەك, 2026 جىلعى 1 قاڭتاردان باستاپ سالىقتىق اكىمشىلەندىرۋ "تازا پاراقتان" جۇرگىزىلەدى, بۇل ميكرو جانە شاعىن بيزنەسكە قاتىستى مىنا جايتتاردى كوزدەيدى:

• سالىقتىق تەكسەرۋلەر الىنىپ تاستالادى;
• كامەرالدىق باقىلاۋ الىنىپ تاستالادى;
• سوت ورگاندارىنا مامىلەلەردى جارامسىز دەپ تانۋ تۋرالى تالاپ-ارىز بەرۋ توقتاتىلادى;
• سوت ورگاندارىنا تىركەۋدى, قايتا تىركەۋدى جارامسىز دەپ تانۋ تۋرالى تالاپ-ارىز بەرۋ توقتاتىلادى.
• سالىقتار مەن تولەمدەر بويىنشا سالىنعان وسىمپۇلدار مەن ايىپپۇلدار 2026 جىلدىڭ 1 ساۋىرىنە دەيىن نەگىزگى قارىز وتەلگەن جاعدايدا جويىلادى.
• ققس بويىنشا ەسەپكە قويۋ شەگىنەن اسقان سالىق تولەۋشىلەر اكىمشىلىك جاۋاپكەرشىلىككە تارتىلمايدى. سونداي-اق سالىق تولەۋشىلەر ۇشىن سالىق جانە ادىلەت ورگاندارىندا كامەرالدىق جانە سالىقتىق تەكسەرۋلەر جۇرگىزبەي-اق, وڭايلاتىلعان تارتىپپەن ەسەپتەن شىعارۋ ناۋقانى وتكىزىلەدى.

بۇل جاڭا سالىق كودەكسىن كەزەڭ-كەزەڭىمەن ەنگىزۋگە جانە سالىق تولەۋشىلەر ۇشىن سالىقتىق اكىمشىلەندىرۋدى جەڭىلدەتۋگە مۇمكىندىك بەرەدى", - دەلىنگەن ۇكىمەت حابارلاماسىندا.