قازاقستان اۋىل شارۋاشىلىعى مينيسترلىگى سيىر ەتىنىڭ ەكسپورتىنا شەكتەۋ ەنگىزۋدى ۇسىندى. اگەنتتىك تيىستى بۇيرىق جوباسىن دايىنداپ, "اشىق نقا" پورتالىندا جارييالادى, دەپ حابارلايدى Shalqar.kz.

بۇل شارالاردىڭ ماقساتى – ەلدىڭ ازىق-تۇلىك قاۋىپسىزدىگىن قامتاماسىز ەتۋ, مال شارۋاشىلىعى ونىمدەرىن قايتا وڭدەۋدى دامىتۋ, سونداي-اق سيىر ەتىنە باعانى تۇراقتاندىرۋ.

"بۇيرىق جوباسىندا قازاقستان اۋماعىنان 2025 جىلعى 31 جەلتوقسانعا دەيىن ىرى قارا مال ەتىن (سيىر ەتىن) (ەۋرازييالىق ەكونوميكالىق وداقتىڭ سىرتقى ەكونوميكالىق قىزمەتىنىڭ تاۋار نومەنكلاتۋراسىنىڭ كودتارى: 0201 – ىرى قارا مال ەتى, جاڭا سويىلعان نەمەسە سالقىنداتىلعان جانە 0202 – ىرى قارا مال ەتى, مۇزداتىلعان) ۇشىنشى ەلدەرگە جانە ەۋرازييالىق ەكونوميكالىق وداق ەلدەرىنە شىعارۋعا ساندىق شەكتەۋلەر (كۆوتالار) ەنگىزۋ كوزدەلگەن", - دەلىنگەن قۇجاتتىڭ سيپاتتاماسىندا.

جوبا 22 قازانعا دەيىن قوعامدىق تالقىلاۋعا سالىنباق.