رەسپۋبليكا كۇنى قارساڭىندا جەتىسۋ وبلىسىندا وڭىردىڭ 8 اۋدانى مەن 2 قالاسىنىڭ اۋىل شارۋاشىلىعى تاۋار وندىرۋشىلەرىنىڭ قاتىسۋىمەن جارمەڭكە وتتى, – دەپ حابارلايدى جەتىسۋ وبلىسى اكىمىنىڭ باسپاسوز قىزمەتىنە سىلتەمە جاساعان Shalqar.kz تىلشىسى.

وبلىس ورتالىعى تالدىقورعان قالاسىندا وتكەن جارمەڭكەگە وبلىس اكىمىنىڭ بىرىنشى ورىنباسارى الىبەك جاقانباەۆ قاتىستى.

تالدىقورعان تۇرعىندارى مەن قالا قوناقتارى جارمەڭكەدە اۋىل شارۋاشىلىعى تاۋار وندىرۋشىلەرىنەن تىكەلەي قولجەتىمدى باعادا بالعىن ارى ساپالى ونىمدەردى ساتىپ الۋعا مۇمكىندىك الدى.

جارمەڭكەدە جالپى كولەمى شامامەن 137 توننا بولاتىن 54 تۇرلى ونىم ۇسىنىلدى. اتاپ ايتقاندا, 19,1 توننا كوكونىس, 12,1 توننا ەت, 3,5 توننا بالىق, 1,4 توننا سۇت ونىمدەرى, 20,4 توننا كارتوپ, 7,7 توننا جەمىس-جيدەك, 4 توننا قانت, 0,8 توننا بال جانە شامامەن 72 توننا باسقا دا تۇرلى ونىمدەر ساۋدالاندى.

ساتۋشىلار مەن كەلۋشىلەر جارمەڭكەنىڭ قوس تاراپقا دا تيىمدى ەكەنىن جەتكىزدى.

– بىزدە تاۋىق ەتىنەن جاسالعان ونىمنىڭ تۇر-تۇرى بار, سونىمەن قاتار جۇمىرتقانىڭ بىرنەشە سورتىن ۇسىندىق. جارمەڭكەگە 100 كگ تاۋىق ەتى, 50 كگ بالاپان ەتى جانە قوسىمشا سۋبونىمدەر الىپ كەلدىك. ونىمدەرىمىزگە دەگەن سۇرانىس جوعارى, بۇل ونىمنىڭ ساپالىلىعى مەن باعاسىنىڭ قولجەتىمدى بولعانىنىڭ ارقاسىندا دەپ ويلايمىن. مىسالى, بىر دانا جۇمىرتقانىڭ باعاسى 25 تەڭگە مەن 55 تەڭگەنىڭ ارالىعىندا, – دەيدى «كوگەر لتد» جشس فيرمالىق دۇكەنىنىڭ ساتۋشىسى ايگۇل ساتىبالدينا.

– بىز جارمەڭكەگە 7 قويدىڭ ەتىن الىپ كەلدىك. مال شارۋاشىلىعىمەن 10 جىلدان بەرى اينالىسامىز. تالدىقورعاندىقتاردىڭ بىزدىڭ ونىمىمىزگە ريزا بولاتىنىنا سەنەمىز, – دەدى اقسۋ اۋدانىنىڭ فەرمەرى سەرىكبول قايراتبەك.

– بىز ونىمدەردىڭ سان تۇرى مەن تومەن باعالارىنا ريزا بولدىق. بارى دە ادەمى, ۇقىپتى قويىلعان, كوز سۇيسىنەدى. ەت, بالىق, كوكونىس ساتىپ الدىق. وسىنداي جارمەڭكەلەر جيى ۇيىمداستىرىلسا ەكەن دەيمىز. مەرەكە قارساڭىندا حالىق يگىلىگى ۇشىن اۋىل شارۋاشىلىعى جارمەڭكەسىنىڭ وتكىزىلگەنىنە قۋانامىز, – دەدى تالدىقورعاندىق پوگورەلوۆتار وتباسى.

نەگىزگى ازىق-تۇلىك تاۋارلارىنىڭ باعاسىن تۇراقتاندىرۋ جانە وتاندىق وندىرۋشىلەردى قولداۋ ماقساتىندا تالدىقورعاندا ۇيىمداستىرىلعان جارمەڭكەدە 128,8 ميلليون تەڭگەدەن استام سوماعا اۋىل شارۋاشىلىعى ونىمدەرىن ساتۋ جوسپارلانعان.