Almatı qwrılıs-tehnikalıq kolledjiniñ 3 kurs studentteri Ğabbas Bayazitov, Georgiy Şikin, Nazim Aliev avtomattandıru üderisteri, sensorlıq baqılau jäne jasandı intellekt elementteri biriktirilgen «aqıldı jılıjay» prototipin oylap taptı – dep habarlaydı Oqu-ağartu ministrliginiñ baspasöz qızmetine silteme jasağan Shalqar.kz.

IoT qwrılğıları men bağdarlamalıq jasaqtamanıñ integraciyasınıñ arqasında jılıjay mikroklimattı, jarıqtandıru men suarudı özdiginen rettey aladı. Joba ösimdikterdi ösiru tiimdiligin arttıruğa jäne onı kütip-baptauğa adamnıñ aralasuın barınşa azaytuğa bağıttalğan.
Ayta ketu kerek, jasandı intellektti paydalanu derekterdi taldauğa, ösimdikterdiñ qajettilikterin boljauğa jäne jağdaylardı naqtı uaqıtta beyimdeuge mümkindik beredi.

«Bwl joba studentterdiñ innovaciyağa degen wmtılısınıñ nätijesi. Öndiristik oqıtu şeberleriniñ jetekşiligimen studentter özderiniñ tehnikalıq dayarlıqtarı men injenerlik oylau qabiletteriniñ joğarı deñgeyin körsetti. Jobanı jasau barısında olar mwnday jüyege degen swranıstı taldap, agrotehnika men cifrlandıru salasındağı zamanaui tehnologiyalardı zerttep, jılıjaydıñ jwmısın oñtaylandıru üşin maşinalıq oqıtu algoritmderin engizdi», – deydi joba jetekşisi Şerniyaz Kabduşev.

Energoünemdilik pen jüyeniñ twraqtılığına erekşe män berligen, jılıjay kün panel'derimen jabdıqtalğan, al bağdarlamalıq qamtamasız etu jüyesi internetke şekteuli qoljetimdilik jağdayında da jwmıs istey alatınday etip jasalğan.

Studentter jobanı odan äri damıtudı josparlap otır. Aldağı uaqıtta qaşıqtıqtan baqılauğa arnalğan mobil'di qosımşa jasap, sensorlıq jüyeniñ funkcionalın keñeytu közdelude.