استانا قالاسىنداعى قوشكە كەمەڭگەرۇلى اتىنداعى №49 مەكتەپ-گيمنازيياسىنىڭ 10 «ا» سىنىپ وقۋشىسى قۋاندىق اميرحان ەرەكشە جوباسىن تانىستىردى. ول كورۋ قابىلەتى ناشار جانە مۇلدە كورمەيتىن جاندارعا ارنالعان اقىلدى كوزىلدىرىك جاساپ شىعاردى, دەپ حابارلايدى ەلوردا اكىمدىگىنىڭ رەسمي سايتىنا سىلتەمە جاساعان Shalqar.kz.

جاس ونەرتاپقىشتىڭ بۇل جوباسى كوزى ناشار كورەتىن ادامدارعا كۇندەلىكتى ومىردە كوشەدە ەركىن قوزعالىپ, تۇرلى كەدەرگىلەردەن ساقتانۋعا مۇمكىندىك بەرەدى. اقىلدى كوزىلدىرىكتىڭ باستى ەرەكشەلىگى — ادامنىڭ الدىندا بىر مەتر قاشىقتىقتان باستاپ كەدەرگى پايدا بولعاندا, الدىن الا قازاق تىلىندە «ساقتانىڭىز, الدىڭىزدا كەدەرگى!» دەگەن داۋىستىق ەسكەرتۋ جاسايدى.

قۋاندىق اميرحان بۇل كوزىلدىرىكتى زاعيپ جانداردىڭ قاۋىپسىزدىگىن قامتاماسىز ەتۋ ماقساتىندا قۇراستىرعانىن ايتادى. الداعى ۋاقىتتا ول جۇمىستىڭ اۋقىمىن كەڭەيتىپ, باسقا دا نۇسقامالاردى ەنگىزۋدى كوزدەپ وتىر.

بۇل باستاما — جاس ونەرتاپقىشتىڭ عىلىم مەن تەحنولوگييا سالاسىنا دەگەن قىزىعۋشىلىعىنىڭ ناتيجەسى عانا ەمەس, سونىمەن قاتار الەۋمەتتىك جاۋاپكەرشىلىك پەن جاناشىرلىقتىڭ ۇلگىسى.

اقىلدى كوزىلدىرىك الەۋمەتتىك ماڭىزى زور جاڭالىق رەتىندە قوعامنىڭ قولداۋىنا يە بولارى سوزسىز. جوبا زاعيپ جانداردىڭ ومىر سۇرۋ ساپاسىن ارتتىرىپ, ولاردىڭ وز بەتىمەن قوزعالۋىنا ۇلكەن سەپتىگىن تيگىزبەك.