بۇل تۋرالى ۋسي قالاسىندا دۇنيەجۇزىلىك تاەكۆوندو (WT) فەدەراتسيياسىنىڭ الەم چەمپيوناتى اياسىنداعى جيىنىندا بەلگىلى بولدى, دەپ حابارلايدى Shalqar.kz تىلشىسى.

قازاقستان 2027 جىلعى الەم چەمپيوناتىن وتكىزۋگە ۇمىتكەر ەلدەردىڭ قاتارىندا بولعان. جيىن بارىسىندا دۇنيەجۇزىلىك تاەكۆوندو فەدەراتسيياسى مەن وعان مۇشە ەلدەردىڭ وكىلدەرى قازاقستاننىڭ كانديداتۋراسىن بىراۋىزدان قولدادى.

قازاقستاندى تاەكۆوندودان الەم چەمپيوناتىن قابىلداۋعا قاۋقارلى ەلمىز دەپ سانايمىن. بىز كەز كەلگەن جارىستى جوعارى دارەجەدە, الەمدىك تالاپتارعا ساي قابىلداي الاتىنىمىزدى استانادا وتكەن «Kazakhstan Open» جارىسىندا دالەلدەدىك دەپ ويلايمىن. تامىز ايىندا وتكەن حالىقارالىق جارىسىمىزعا 700-دەن استام سپورتشى قاتىستى. ودان بولەك, دۇنيەجۇزىلىك تاەكۆوندو فەدەراتسيياسىنىڭ پرەزيدەنتى دوكتور چۋنگۆون چوۋ مىرزادان باستاپ, جارىسىمىزعا قوناق بولعان بارلىق وكىل جوعارى باعالادى, - دەيدى قازاقستاندىق تاەكۆوندو (WT) فەدەراتسيياسىنىڭ پرەزيدەنتى قۇدىرەت شاميەۆ.

قازاقستان ورتا ازييادا تاەكۆوندودان (WT) الەم چەمپيوناتىن قابىلدايتىن العاشقى ەل بولىپ تىركەلدى. فەدەراتسييا 2027 جىلعى الەم چەمپيوناتىن استانا قالاسىندا وتكىزۋدى جوسپارلاپ وتىر.

2028 جىلعى لوس-اندجەلەستە وتەتىن جازعى وليمپيادا ويىندارى الدىنداعى شەشۋشى ارى جاۋاپكەرشىلىگى مول الەم چەمپيوناتىن ەلىمىزدە وتكىزۋ بىز ۇشىن ۇلكەن مارتەبە. ەلىمىزدىڭ اتىن دۇنيەجۇزىلىك تاەكۆوندو كارتاسىندا بەلگىلەيتىنىمىزگە قۋانىشتىمىز! بارشا قازاق ەلىن وسىنداي سۇيىنشى جاڭالىقپەن قۇتتىقتايمىن. بۇل بىزدىڭ جۇمىلا اتقارعان جۇمىسىمىزدىڭ جەمىسىنىڭ بىرى, - دەدى ول.

ايتا كەتەيىك, قازىرگى تاڭدا ۋسي قالاسىنا الەمنىڭ 179 ەلىنەن 991 تاەكۆوندوشىسى 2025 جىلعى الەم چەمپيوناتىنا قاتىسۋعا جينالدى. 24-30 قازان ارالىعىندا وتەتىن الەم بىرىنشىلىگىندە ەل نامىسىن 16 تاەكۆوندوشى قورعايدى.