الماتىدا بىرەگەي نىسان – بيىك تاۋلى سپورت كەشەنى "مەدەۋدى" جاڭارتۋ جۇمىستارى باستالدى, - دەپ حابارلايدى Shalqar.kz تىلشىسى.

ۆەدومستۆو مالىمەتىنەشە, قازىر دايىندىق كەزەڭى جۇرىپ جاتىر, الداعى ۋاقىتتا قۇرىلىس ايماعى قورشالىپ, نەگىزگى جۇمىستار باستالادى.

"جوبا اياسىندا مۇز ايدىنىنا ارنالعان جاڭا توڭازىتقىش جۇيەسى ورناتىلادى, ينجەنەرلىك كوممۋنيكاتسييالار تولىق جاڭارتىلىپ, كەشەن گازبەن قامتاماسىز ەتىلەدى. مۇزدىڭ ساپاسى مەن جاعدايىن ناقتى ۋاقىت رەجيمىندە باقىلايتىن جاساندى ينتەللەكت جۇيەسى ەنەرگييا تۇتىنۋىن 25 پايىزعا دەيىن ازايتۋعا مۇمكىندىك بەرەدى", - دەلىنگەن حابارلامادا.

سونداي-اق, كورەرمەندەرگە ارنالعان جىلى ارى جەكە رەتتەلەتىن ورىندىقتار قويىلادى.

زاماناۋي سپورتتىق جانە ساۋىقتىرۋ كەشەنىن جاساۋعا ەرەكشە كوڭىل بولىنگەن. بۇرىنعى ماشينا زالىنىڭ ماڭىندا كولەمى 25×15 مەتر, جىلى سۋى بار اشىق باسسەين سالىنادى.

"كەلۋشىلەردىڭ ىڭعايى ۇشىن تريبۋنا مەن قابىلداۋ بولمەسى, كيىم اۋىستىراتىن بولمەلەر جانە ت.ب. قىزمەت كورسەتۋ عيماراتى قاراستىرىلعان. بۇل جاڭا باسسەين جىل بويى جۇمىس ىستەپ, قالا تۇرعىندارى مەن تۋريستەرگە تاۋ باۋرايىندا تازا اۋادا جۇزۋ مۇمكىندىگىن ۇسىنادى".

كەشەننىڭ اينالاسىندا سەرۋەن جولدارى بار ەرەكشە ەكوپارك سالۋ جوسپارلانعان.

"ول جەردەن جاساندى سارقىراما, كىشى الماتى وزەنى مەن تاۋدىڭ اسەم كورىنىسىن تاماشالاۋعا بولادى. نەگىزگى نىسانداردى جانە جاڭا دەمالىس ايماقتارىن بايلانىستىراتىن شىعىس جانە باتىس باعىتتاردا جۇرگىنشىلەرگە ارنالعان ەكى كوپىر سالىنادى".

سونداي-اق, جەرگىلىكتى كليماتقا توزىمدى جاڭا اعاشتار مەن بۇتالار ەگىلىپ, بۇكىل اۋماق زاماناۋي جارىقتاندىرۋ جانە ساۋلەتتىك شامدارمەن بەزەندىرىلەدى. مۇمكىندىگى شەكتەۋلى جاندارعا ىڭعايلى بولۋى ۇشىن ەكى جولاۋشى جەدەل ساتى ورناتىلادى.

"بۇل جۇمىستار 2027 جىلدىڭ 4-شى توقسانىنا تولىق بىتەدى دەپ جوسپارلانىپ وتىر", - دەلىنگەن حابارلامادا.