قىمباتتى وتانداستار! 

رەسپۋبليكا كۇنى قۇتتى بولسىن!

قازاقستان وسىدان 35 جىل بۇرىن ەگەمەندىك دەكلاراتسيياسىن قابىلداپ, جاڭا داۋىرگە قادام باستى. تاريحي قۇجاتتا حالقىمىزدىڭ وز بولاشاعىن دەربەس ايقىنداۋ قۇقىعى ناقتى كورىنىس تاپتى. سول ارقىلى بوستاندىقتىڭ بايراعىن كوتەرىپ, زاماناۋي مەملەكەت قۇرۋىمىزعا جول اشىلدى.

سودان بەرى ەلىمىز قيىن دا كۇردەلى جولدان وتتى. بىز تاۋەلسىزدىگىمىزدىڭ ساياسي-ەكونوميكالىق تۇعىرىن بەكىتتىك, شەكارامىزدى ايقىنداپ, ونى بۇكىل الەمگە تانىتتىق, جاڭا استانامىزدى سالدىق. سونداي-اق جالپىۇلتتىق بىرەگەيلىگىمىزدى نىعايتۋ, ازاماتتارىمىزدىڭ ال-اۋقاتىن ارتتىرۋ جولىندا زور جەتىستىككە قول جەتكىزدىك. قازاقستان ساليقالى ارى سىندارلى سىرتقى ساياساتىنىڭ ارقاسىندا وزىنىڭ ۇلتتىق مۇددەسىنە ادال, حالىقارالىق ابىروي-بەدەلى جوعارى مەملەكەت رەتىندە قالىپتاستى. 

دەگەنمەن الدىمىزدا بۇدان دا زور مىندەتتەر تۇر. بىز قازىرگى الماعايىپ زامانداعى وراسان سىن-قاتەرلەرگە قاراماستان, بارلىق ازاماتقا بىردەي مۇمكىندىك بەرەتىن ادىلەتتى قازاقستاندى قۇرىپ جاتىرمىز. ساياساتتاعى, ەكونوميكا مەن الەۋمەتتىك سالاداعى رەفورمالار وتانىمىزدىڭ وسىپ-وركەندەۋىن قامتاماسىز ەتىپ, حالقىمىزدىڭ تۇرمىس ساپاسىن ارتتىرۋدى كوزدەيدى.

بىز «زاڭ جانە تارتىپ» قاعيداتىن, «تازا قازاقستان» يدەولوگيياسىن, وتانشىلدىق پەن تىلەۋلەستىك, ەڭبەكقورلىق پەن جاۋاپكەرشىلىك, بىلىمپازدىق پەن كاسىبيلىك قۇندىلىقتارىن قوعامدا بارىنشا ورنىقتىرىپ, كەلەشەگىنە سەنىممەن قارايتىن وزىق ويلى ۇلت رەتىندە قالىپتاسىپ كەلەمىز. 

ار بۋىننىڭ وز ميسسيياسى بار. وسى ورايدا, بابالار وسيەتىن ۇمىتپاي, قاستەرلى تاۋەلسىزدىگىمىزدى نىعايتا تۇسۋ, قازاقستاندى دامىعان, جاسامپاز ارى ادىلەتتى ەل ەتۋ – بارىمىزگە ورتاق پارىز. 

بىز ەسەلى ەڭبەكتىڭ, وزارا قولداۋدىڭ جانە ەڭ باستىسى, مىزعىماس بىرلىكتىڭ ارقاسىندا بارلىق جوسپارىمىزدى تابىستى جۇزەگە اسىرىپ, جاڭا بەلەستەردى باعىندىرا بەرەتىنىمىزگە سەنىمدىمىن. 

ەلىمىزدىڭ كەلەشەگى – ارقايسىمىزدىڭ قولىمىزدا. 

قازاقستاننىڭ كوك تۋى اردايىم بيىكتە جەلبىرەسىن! 

بارشاڭىزعا زور دەنساۋلىق, باق-بەرەكە جانە مول تابىس تىلەيمىن!