Qımbattı otandastar! 

Respublika küni qwttı bolsın!

Qazaqstan osıdan 35 jıl bwrın Egemendik deklaraciyasın qabıldap, jaña däuirge qadam bastı. Tarihi qwjatta halqımızdıñ öz bolaşağın derbes ayqındau qwqığı naqtı körinis taptı. Sol arqılı bostandıqtıñ bayrağın köterip, zamanaui memleket qwruımızğa jol aşıldı.

Sodan beri elimiz qiın da kürdeli joldan ötti. Biz Täuelsizdigimizdiñ sayasi-ekonomikalıq twğırın bekittik, şekaramızdı ayqındap, onı bükil älemge tanıttıq, jaña astanamızdı saldıq. Sonday-aq jalpıwlttıq biregeyligimizdi nığaytu, azamattarımızdıñ äl-auqatın arttıru jolında zor jetistikke qol jetkizdik. Qazaqstan saliqalı äri sındarlı sırtqı sayasatınıñ arqasında öziniñ wlttıq müddesine adal, halıqaralıq abıroy-bedeli joğarı memleket retinde qalıptastı. 

Degenmen aldımızda bwdan da zor mindetter twr. Biz qazirgi almağayıp zamandağı orasan sın-qaterlerge qaramastan, barlıq azamatqa birdey mümkindik beretin Ädiletti Qazaqstandı qwrıp jatırmız. Sayasattağı, ekonomika men äleumettik saladağı reformalar Otanımızdıñ ösip-örkendeuin qamtamasız etip, halqımızdıñ twrmıs sapasın arttırudı közdeydi.

Biz «Zañ jäne tärtip» qağidatın, «Taza Qazaqstan» ideologiyasın, otanşıldıq pen tileulestik, eñbekqorlıq pen jauapkerşilik, bilimpazdıq pen käsibilik qwndılıqtarın qoğamda barınşa ornıqtırıp, keleşegine senimmen qaraytın ozıq oylı wlt retinde qalıptasıp kelemiz. 

Är buınnıñ öz missiyası bar. Osı orayda, babalar ösietin wmıtpay, qasterli Täuelsizdigimizdi nığayta tüsu, Qazaqstandı damığan, jasampaz äri ädiletti el etu – bärimizge ortaq parız. 

Biz eseli eñbektiñ, özara qoldaudıñ jäne eñ bastısı, mızğımas birliktiñ arqasında barlıq josparımızdı tabıstı jüzege asırıp, jaña belesterdi bağındıra beretinimizge senimdimin. 

Elimizdiñ keleşegi – ärqaysımızdıñ qolımızda. 

Qazaqstannıñ kök tuı ärdayım biikte jelbiresin! 

Barşañızğa zor densaulıq, baq-bereke jäne mol tabıs tileymin!