Қазіргі жастар – ақпарат дәуірінің өкілі. Күн сайын миллиондаған жазба жазылып, сансыз пікір қалдырылады. Әлеуметтік желі жастардың ой-өрісін кеңейтіп, өзін еркін көрсетуге мүмкіндік береді. Бірақ сол еркіндіктің артында жауапкершілік те бар екенін ұмытпауымыз керек.

Желіде жазған әрбір сөз – мәдениет көрсеткіші. Өкінішке қарай, кей жастар қазақ тілін шұбарлап, шетелдік сөздерді орынсыз қолданады. Бірі "қазақша жазсам, түсінбейді" десе, енді бірі "қысқаша жазған ыңғайлы" деп сылтау айтады. Ал шын мәнінде, тіл – ұлттың жаны, рухының көрінісі. Оны қадірлеу – әр азаматтың парызы.

Тіл мәдениетін сақтау — тек мектеп пен мұғалімнің емес, тұтас қоғамның міндеті. Әлеуметтік желіні таза, сауатты тілмен қолдану – ұлтқа деген құрметтің белгісі. Егер жастар желіде де әдемі сөйлеп, орынды жазса, қазақ тілі де заманауи, беделді, тартымды бола алады.

Авторы: Сәбитова Амина