Білім

Автор: ADMIN

Білім 2025-11-02 12:34:00

Следуй за нами

26

Қазақстан – білімнің жаһандық орталығына айналуда

news single

     Президент: «2029 жылға қарай елімізде білім алатын шетелдік студенттер санын 100 мыңға жеткізу көзделіп отыр»-, деп хабарлайды “Shalqar.kz” “Qazaqparat” телеграм каналына сілтеме жасап.

 

       Астана төрінде өткен халықаралық форумда Мемлекет басшысы Қасым-Жомарт Тоқаев Қазақстанның жоғары білім саласындағы жаңа мақсат-міндеттерін айқындады. Президенттің айтуынша, еліміз бүгінде аймақтық қана емес, халықаралық білім хабы болуға нық қадам жасап отыр. «Қазір еліміздің жоғары оқу орындарында 31 мыңнан астам шетелдік студент білім алуда. Бұл – Қазақстан үшін тарихи, рекордтық көрсеткіш. Бірақ біз мұнымен тоқтап қалмаймыз. 2029 жылға қарай шетел студенттерінің санын - 100 мыңға дейін арттыруды көздеп отырмыз», – деді Мемлекет басшысы.

 

    Бұл мақсатқа жету үшін мемлекет білім алушыларға қолайлы жағдай жасауға басымдық береді. Виза рәсімдеу жеңілдетіліп, шетел азаматтарының елімізде еркін әрі қауіпсіз білім алуына мүмкіндік жасалмақ. Сонымен қатар үздік түлектердің Қазақстанда қалып, еңбек етуіне жол ашатын жұмыспен қамту бағдарламасы іске қосылады. Президент атап өткендей, шетелдік университеттердің филиалдарын ашу – инженерлік және IT салаларындағы кадр даярлау ісін жаңа деңгейге көтереді. «Қазақстанда Қытай үкіметінің бастамасымен үш Лу Бань шеберханасы ашылды. Бұл – қолданбалы инженерияның озық үлгісі. Сондай-ақ ядролық энергетика саласына маман дайындау біз үшін стратегиялық міндет. Ресейдің Ұлттық ядролық зерттеу университеті – МИФИ осы бағытта ынтымақтасуға әзір екенін білдірді», – деді Қасым-Жомарт Тоқаев.

 

     Мемлекет басшысы отандық жоғары оқу орындарының ғылыми жобаларына да ерекше тоқталды. «Қозыбаев университеті мен Аризона университетінің серіктестігі нәтижесінде күкіртті инновациялық полимерге айналдыратын жаңа технология әзірленді. Бұл – еліміздің химия өнеркәсібі үшін тың серпін, экологиялық мәселелерді шешудің нақты жолы», – деді Президент. Қасым-Жомарт Тоқаевтың сөзінше, бүгінгі міндет – білім мен ғылымды экономиканың нақты секторы мен өндіріс саласына тікелей байланыстыру. Себебі жаңа технология, инновациялық шешім мен жасампаз идея тек университет қабырғасында емес, елдің даму стратегиясының өзегінде тұруы тиіс.

 

     Қазақстанның жоғары білім жүйесі қазір жаһандық таным мен тәжірибе тоғысқан кеңістікке айналып келеді. Бұл – елдің интеллектуалды әлеуетін арттырып қана қоймай, Қазақстанды халықаралық деңгейдегі білім орталығына айналдыруға бағытталған тарихи бетбұрыс.

Басқалармен бөлісе отырыңыз
Пікірлер

Все новости


Международное интернет-издание "Shalqar kz"
Подписка на важную информацию международного интернет-издания "Shalqar kz" Будьте в курсе последних новостей Ваша электронная почта подписаться