مەملەكەت باسشىسىنىڭ تاپسىرماسى بويىنشا بىلىم بەرۋ سالاسىندا اۋقىمدى ينفراقۇرىلىمدىق جوبالار جۇزەگە اسىرىلىپ كەلەدى. نەگىزگى ماقسات – ۇش اۋىسىمدى وقىتۋ ماسەلەسىن شەشۋ, وقۋشى ورىندارىنىڭ تاپشىلىعى مەن اپاتتى مەكتەپتەردى جويۋ, دەپ حابارلايدى Shalqar.kz قر وقۋ-اعارتۋ مينيسترلىگىنە سىلتەمە جاساپ.

ەل وڭىرلەرىندە 267 مىڭ وقۋشى ورنىنا ارنالعان 232 جاڭا مەكتەپتىڭ قۇرىلىسى جۇرگىزىلىپ جاتىر. بيىل 157 مىڭ وقۋشى ورنىنا ارنالعان 105 جاڭا مەكتەپ پايدالانۋعا بەرىلدى. ونىڭ ىشىندە 135 مىڭ وقۋشى ورنىنا ارنالعان 71 مەكتەپ «كەلەشەك مەكتەپتەرى» ۇلتتىق جوباسى اياسىندا سالىندى. جاڭا مەكتەپتەردىڭ باسىم بولىگى تۇركىستان, ماڭعىستاۋ, الماتى, اقتوبە جانە جامبىل وبلىستارىندا ورنالاسقان.

ۇلتتىق جوبا اياسىندا جالپى 460 مىڭ ورىنعا ارنالعان 217 زاماناۋي مەكتەپ سالۋ جوسپارلانعان, ونىڭ 40%-دان استامى اۋىلدىق جەرلەردە بوي كوتەرەدى. جاڭا فورماتتاعى مەكتەپتەر بۇرىنعى تيپتىك مەكتەپتەردەن ەداۋىر ەرەكشەلەنەدى: ولاردىڭ جالپى اۋماعى 15–20%-عا ۇلكەن, ال تەحنيكالىق جابدىقتالۋ دەڭگەيى تورت ەسە جوعارى. ار مەكتەپتە روبوتوتەحنيكا كابينەتتەرى, STEM-زەرتحانالار, حورەوگرافييا زالدارى, كوۆوركينگ ايماقتارى مەن تورتكە دەيىن سپورت زالى قاراستىرىلعان.

سونىمەن قاتار شاعىن قالالاردا, اۋدان ورتالىقتارىندا جانە اۋىلداردا ورنالاسقان 1000 مەكتەپ جاڭعىرتىلۋدا. باعدارلاما اياسىندا كۇردەلى جوندەۋ جۇمىستارى, جيھازدار جاڭارتۋ, كىتاپحانالار, اسحانالار مەن قاۋىپسىزدىك جۇيەلەرىن جاڭعىرتۋ قاراستىرىلعان. بۇل وز كەزەگىندە ەلىمىزدىڭ بارلىق وڭىرلەرىندە بالالارعا جايلى جانە قاۋىپسىز بىلىم الۋ جاعدايىن قامتاماسىز ەتەدى.

كەلەسى كەزەڭدە مەكتەپتەردىڭ ينفراقۇرىلىمىن بىرىڭعاي زاماناۋي فورماتقا كوشىرۋ بويىنشا جۇمىستار جۇرگىزىلۋدە. پرەزيدەنتتىڭ تاپسىرماسىنا سايكەس مەكتەپتەردى رەنوۆاتسييالاۋدىڭ اۋقىمدى باعدارلاماسى جۇزەگە اسىرىلىپ جاتىر. باعدارلاما شەڭبەرىندە عيماراتتاردىڭ قاسبەتتەرى مەن شاتىرلارى جاڭارتىلىپ, تەرەزەلەر اۋىستىرىلادى, ينجەنەرلىك جەلىلەرگە كۇردەلى جوندەۋ جۇرگىزىلىپ, اۋماقتار اباتتاندىرىلىپ, كوگالداندىرىلادى.