Энергетика министрі Алмасадам Сәтқалиев ақпан айынан бастап бензин, дизель отыны мен сұйытылған газдың қымбаттайтынын мәлімдеді, деп хабарлайды Shalqar.kz.

Министрдің айтуынша, жанар-жағармай бағасын көтеру туралы шешім бұрын қабылданған. 

“Мұнай өнімдерінің бағасының өсуі туралы айтсақ, бұл мәселе Президент жанындағы кеңесте қаралып, нақты шешім қабылданды. Жанар-жағармаймен қатар, сұйытылған мұнай газының бағасын кезең-кезеңімен көтеру жоспарланған. Сонымен қатар, тауарлық газдың да бағасы біртіндеп өседі. Дегенмен, Үкімет бұл процесті бақылауда ұстап, бағаның күрт қымбаттауына жол бермеу үшін тиісті шараларды қолға алады”, – деді министр.

Сәтқалиевтің айтуынша, тауарлық газдың бағасы жазға қарай біртіндеп өседі. Ал сұйытылған газ құны 98 теңгеден аспайды.

 “Өткен жылы сұйытылған газдың бағасы 54-55 теңге аралығында болса, биыл өңірлерге байланысты 59-90 теңге деңгейінде өзгереді. Ең жоғары шекті баға кейбір аймақтарда 64-98 теңге аралығында белгіленеді”, – деді министр.