قاسىم-جومارت توقاەۆ «قازاقستان رەسپۋبليكاسى ىشكى ساياساتىنىڭ نەگىزگى قاعيداتتارى, قۇندىلىقتارى مەن باعىتتارىن بەكىتۋ تۋرالى» جارلىققا قول قويدى, دەپ حابارلايدى Shalqar.kz “Akorda”-عا سىلتەمە جاساپ.

ۇلتتىق قۇرىلتايدىڭ IV وتىرىسىندا ساراپشىلار مەن قوعام قايراتكەرلەرى ىشكى ساياسات سالاسىندا جۇرگىزىلىپ جاتقان بارلىق جۇمىستى رەتتەيتىن بىرىڭعاي تۇجىرىمدامالىق قۇجات ازىرلەۋدى ۇسىنعان ەدى. پرەزيدەنت بۇل يدەيانى قولداپ, ونىڭ مەملەكەتتىك قۇرىلىمدار جۇمىسىن جۇيەلەندىرۋگە باعىتتالۋى كەرەك ەكەنىن اتاپ وتكەن بولاتىن.

پرەزيدەنت اكىمشىلىگى مەن مۇددەلى مەملەكەتتىك ورگاندار مەملەكەت باسشىسىنىڭ جىل سايىنعى جولداۋلارىن, سويلەگەن سوزدەرىن, قازاقستان رەسپۋبليكاسىنىڭ 2029 جىلعا دەيىنگى ۇلتتىق دامۋ جوسپارىن نەگىزگە الا وتىرىپ, «ىشكى ساياساتتىڭ نەگىزگى قاعيداتتارى, قۇندىلىقتارى مەن باعىتتارى» قۇجاتىن دايىندادى.

تۇجىرىمدامالىق قۇجاتتى ازىرلەۋگە ۇلتتىق قۇرىلتايدىڭ مۇشەلەرى, ساراپشىلار, عىلىمي جانە قوعامدىق ۇيىمداردىڭ وكىلدەرى بەلسەنە اتسالىستى.

اتالعان قۇجات بىرىنشى كەزەكتە مەملەكەتتىك ورگاندارعا ارنالعان. ونىڭ باستى ماقساتى – ىشكى ساياسات سالاسىنداعى جۇمىستى جۇيەلەۋ ارى ۇيلەستىرۋ.

وندا «زاڭ جانە تارتىپ», «حالىق ۇنىنە قۇلاق اساتىن مەملەكەت», «تۇرلى كوزقاراس – بىرتۇتاس ۇلت», «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت», «ادال ازامات», «تازا قازاقستان» سەكىلدى ىشكى ساياسات قاعيداتتارى قامتىلعان.

سونداي-اق ۇلتتىق قۇرىلتاي وتىرىستارىندا كوتەرىلگەن جالپىۇلتتىق قۇندىلىقتاردىڭ تىزبەسى ەنگىزىلدى. جالپىۇلتتىق بىرەگەيلىكتى تانىتاتىن ۇلتتىق نىشاندار جۇيەسى جاسالدى.

قۇجاتتا قوعامدىق ديالوگ, ەتنوسارالىق قاتىناس, دىن, مادەني-گۋمانيتارلىق, وتباسى, جاستار, اقپارات سەكىلدى ىشكى ساياساتتىڭ باسىم باعىتتارى ايقىندالعان. قابىلدانعان تۇجىرىمدامالىق قۇجات مەملەكەتتىك ورگانداردىڭ ىشكى ساياسات سالاسىنداعى جۇمىسىن ۇيىمداستىرۋعا نەگىز بولادى.