قورعانىس مينيسترى داۋرەن قوسانوۆ تاياۋدا ەلوردادا بالالارى اسكەردە قازا تاپقان انالاردىڭ ميتينگىنە قاتىستى پىكىر بىلدىردى, دەپ حابارلايدى Shalqar.kz.

— بىز ولاردى قابىلدادىق. انالار ميتينگكە شىققان ماسەلەنىڭ بارى تەرگەۋ ىس-شارالارىنا قاتىستى بولدى. تەرگەۋدى باس اسكەري پروكۋراتۋرانىڭ باقىلاۋىمەن ىشكى ىستەر مينيسترلىگى جۇرگىزىپ جاتىر. ول جەردە بىزگە قاتىسى جوق ماسەلەلەر بولدى, — دەدى داۋرەن قوسانوۆ سەناتتىڭ جالپى وتىرىسىنان كەيىن باق وكىلدەرىنىڭ ساۋالىنا وراي.

ونىڭ ايتۋىنشا, قورعانىس مينيسترلىگى اسكەردەگى تارتىپتى كۇشەيتۋ شارالارىن جۇزەگە اسىرىپ جاتىر. 

— كومانديرلەرمەن, پسيحولوگتەرمەن جۇمىس ىستەپ, كامەرالار ورناتىپ جاتىرمىز. ايىنا 1-2 رەت باسپاسوز قىزمەتكەرلەرىنىڭ ساپارىن ۇيىمداستىرۋدامىز. اسكەردە الىمجەتتىك جوق. بىراق, اسكەردە ەر-ازاماتتار كوپ بولعاننان كەيىن تۇرلى جايتتار بولادى. بۇل قوعامىمىزدا دا بار. جىگىت بولعاننان كەيىن كەلىسپەي, ەرەگەسىپ قالادى. ونداي دا بولادى. اسكەردى قوعامنان بولمەڭىزدەر. بىز دە قوعامنىڭ مۇشەسەمىز, — دەدى مينيستر.

ەسكە سالساق, وسىعان دەيىن ماڭعىستاۋ وبلىسىندا سارباز قايتىس بولعانى حابارلاندى.

پرەزيدەنت اسكەردە قازا تاپقان ساربازدارعا قاتىستى ىستى تەرگەۋ كەزىندە زاڭنىڭ ساقتالۋىن قاداعالاۋدى تاپسىرعان ەدى.

بۇدان بۇرىن باس پروكۋرور بەرىك اسىلوۆ باس پروكۋراتۋرا مەن باس اسكەري پروكۋراتۋرا باسشىلىعى قازا تاپقان جانە جاراقات العان اسكەري قىزمەتشىلەردىڭ انالارىن قابىلدايتىنىن ايتتى.