2025 жылдың 17 қаңтарында АҚШ Жоғарғы соты TikTok-қа тыйым салу туралы заңды мақұлдады. Осыған байланысты танымал әлеуметтік желі ресми түрде бұғатталды, ал қосымша Apple және Google қосымшалар дүкендерінен жойылды, деп хабарлайды Shalqar.kz NBC News-ке сілтеме жасап.

Ел тұрғындары сенбі күні TikTok-қа кіруге тырысқанда, экранда «TikTok-ты пайдалануға тыйым салатын заң күшіне енді» деген хабарлама шықты. Хабарламада президент Трамптың қызметке кіріскен соң, бұл мәселені қайта қарауы мүмкін екені айтылған. Сонымен қатар, TikTok-тың ресми сайтында қолданушылар өз мәліметтерін жүктеп алу үшін жүйеге кіруге мүмкіндік бар екені көрсетілді.

TikTok-тың АҚШ-тағы 170 миллион тіркелген қолданушысы енді бұл желіні пайдалана алмайды. Жаңа қолданушылар қосымшаны жүктеу мүмкіндігінен айырылды.

TikTok-қа қойылған шектеу ұзақ уақыт бойы талқыланып келді. Егер қытайлық ByteDance компаниясы 19 қаңтарға дейін TikTok-ты американдық меншік иесіне сатпаған жағдайда, бұл тыйым толық күшіне енеді. Бұл шешім TikTok-тың деректер қауіпсіздігіне қатысты күмәндардан туындады.

TikTok-тың АҚШ-та бұғатталуы әлеуметтік желінің ғаламдық беделіне әсер етіп, өзге елдердің де мұндай қадамға баруына ықпал етуі мүмкін.