قازاقستان ۇلتتىق بانكى 2025 جىلعى 24 قاراشادا "قاتە اۋدارىلعان" اقشاعا قاتىستى الاياقتىق وقيعالار جيىلەپ كەتكەنىن ەسكەرتتى, دەپ حابارلايدى Shalqar.kz “Kazinform” اگەنتتىگىنە سىلتەمە جاساپ.

اقپارعا سۇيەنسەك, كوپ تارالعان سحەمالاردىڭ بىرى – اقشا تۇسكەنى تۋرالى جالعان حابارلاما جىبەرۋ.

ونداي كەزدە ازاماتتار بانك شوتىنا تۇسكەن اقشا سوماسى تۋرالى SMS-حابارلاما الادى. كەيىن ولارعا قاسكويلەر قوڭىراۋ شالىپ, وزىن اقشا اۋدارعان ادام رەتىندە تانىستىرادى دا, "قاتەلەسىپ اۋدارىپپىن" دەگەن سىلتاۋمەن تۇسكەن اقشانى كەرى قايتارۋدى سۇرايدى. بىراق, كوبىنە مۇنداي حابارلامالار جالعان بولىپ شىعادى.

ماماندار وسىنداي حابارلاما نەمەسە قوڭىراۋ قابىلداعان كەزدە اقشانىڭ قايدان كەلگەنىن تەك بانكتىڭ رەسمي موبيلьدى قوسىمشاسىندا نەمەسە ينتەرنەت-بانكينگ ارقىلى تەكسەرىپ العان ابزال ەكەنىن ايتتى.

سونىمەن قاتار, بەلگىسىز نومىردەن كەلگەن SMS-حابارلاماعا ساق بولىپ, كۇدىكتى سىلتەمەگە وتپەۋ كەرەك ەكەنى ەسكەرتىلدى.

الاياقتىق سحەمانىڭ تاعى بىر تۇرى بار. ول جاعدايدا قاسكويلەر بەلگىلى بىر ازاماتتىڭ شوتىنا شىنايى تۇردە اقشا اۋدارادى.

كەيىن ولار اقشا اۋدارعان ادام بولىپ قوڭىراۋ شالىپ, "قاتەلەسىپ اۋدارعانىن" ايتادى دا, تۇسكەن اقشانى قايتارۋعا باسقا بىر ۇشىنشى تاراپتىڭ شوتىن ۇسىنادى.

اڭگىمە كەزىندە پسيحولوگييالىق قىسىم (مىسالى, اقشا بالانىڭ ەمىنە كەرەك ەكەنىن ايتىپ) كورسەتۋى نەمەسە قۇقىق قورعاۋ ورگاندارىنا, بولماسا, سوتقا شاعىمداناتىنىن ايتىپ, قورقىتۋى مۇمكىن. كوبىنە الاياقتار وزىن "كۇش قۇرىلىمدارىنىڭ" نەمەسە "ۇلتتىق بانكتىڭ قىزمەتكەرى" رەتىندە تانىستىرىپ, جەكە جانە بانك دەرەكتەرىن سۇراتادى.

ۇلتتىق بانك وسىنداي وقيعاعا تاپ بولعان جاعدايدا نەمەسە بەلگىسىز بىرەۋلەردەن اقشا تۇسكەندە ۇشىنشى تاراپتىڭ شوتىنا اقشا اۋدارۋدان ساق بولۋعا شاقىرادى. وزگەدەن كەلگەن اقشانى قايتارۋ امالىن ناقتىلاۋ ۇشىن دەرەۋ بانككە حابارلاسقان دۇرىس. تىپتى قاجەت بولسا, تيىستى وتىنىشتى تاپسىرۋ ۇشىن بانكتىڭ ەڭ جاقىن بولىمشەسىنە بارۋ كەرەك ەكەنى ەسكەرتىلدى.

"ەسكە سالا كەتەيىك, ۇلتتىق بانك قىزمەتكەرلەرى اۋديو جانە ۆيدەوقوڭىراۋ شالمايدى, جەكە تۇلعالاردىڭ شوتىنا قىزمەت كورسەتپەيدى, تۇرلى ينۆەستيتسييالىق قورلار مەن قارجى ونىمدەرىنە قارجى سالىمدارىن ۇسىنبايدى, اقشا قۇرالدارىن ساقتاندىرۋمەن اينالىسپايدى, حالىقپەن دە اقشالاي ەسەپ ايىرىسپايدى" -, دەلىنگەن اقپاراتتا.

ەگەر الاياقتىق ارەكەتكە تاپ بولساڭىز, قازاقستان رەسپۋبليكاسىنىڭ قۇقىق قورعاۋ ورگاندارىنا ارىز تۇسىرۋگە كەڭەس بەرىلدى. سونىمەن قاتار, كەڭەس الۋ ۇشىن 1477 قىسقا نومىرىنە قوڭىراۋ شالىپ, ۇلتتىق بانكتىڭ بايلانىس ورتالىعىنا حابارلاسۋعا بولادى.