اقتاۋدا قۇنى 300 ميلليون دوللار بولاتىن جاڭا تەڭىز پورتىن سالۋ جوسپاردا, دەپ حابارلايدى Shalqar.kz. بۇل تۋرالى ۇكىمەت وتىرىسىندا ايتىلدى. زاماناۋي كەشەن «قىتاي – قازاقستان – اقتاۋ – باكۋ – پوتي – ەۋروپا» جاڭا حالىقارالىق كولىك دالىزىن قالىپتاستىرۋعا ىقپال ەتەدى. جالپى ەلىمىزدە قازىر بەس ىرى ترانسشەكارالىق حاب قۇرۋ قولعا الىنعان. ولار قازاقستاندى نەگىزگى كولىك-لوگيستيكالىق تورابىنا اينالدىرۋى تيىس.  
ترانسشەكارالىق حابتاردى دامىتۋ. بۇل نىساندارعا بارۋ ۇشىن قازىر كولىك ينفراقۇرىلىم تولىق بار. بىراق ول جولداردى كەڭەيتۋ, كەي بولىكتەرىن جاڭعىرتۋ قاجەت. قازىر تاسىمالدىڭ ارتۋىنا بايلانىستى ولارعا جاڭا تەمىر جول جەلىلەرىن توسەۋ قاجەت دەيدى ماماندار. 
اڭگىمە قاي ايماقتارعا قاتىستى بولىپ تۇرعانىن ساۋدا جانە ينتەگراتسييا مينيسترى ارمان شاققاليەۆ مالىمدەدى. وزبەكستانمەن شەكارادا «ورتالىق ازييا» حالىقارالىق ونەركاسىپتىك كووپەراتسييا ورتالىعى قۇرىلۋدا. ال ەلىمىزدىڭ شىعىسىندا ارنايى ەكونوميكالىق ايماقتاردى بىرىكتىرەتىن قورعاس تورابى بولادى. باتىس قازاقستاندا «ەۋرازييا» ترانسشەكارالىق ساۋدا ورتالىعى جۇمىس ىستەپ تۇر. جامبىل وبلىسىندا ساۋدا-لوگيستيكالىق كەشەنى سالىنىپ جاتىر. ورتالىقتا تاۋاردى وڭدەۋ جانە بولۋ قىزمەتى اتقارىلادى. اقتاۋدا تاعى بىر پورت بوي كوتەرەدى. سونىڭ ناتيجەسىندە جۇكتەردى جەتكىزۋ مەرزىمىن قىسقارتىپ, تاسىمالداۋ شىعىنىن 18% تومەندەتۋ كوزدەلۋدە.