Қазақстанда Ұлы Отан соғысындағы Жеңістің 80 жылдығын атап өтуге орай ерекше қамқорлық жасалмақ. ҰОС ардагерлеріне 5 миллион теңге көлемінде біржолғы материалдық көмек көрсету жоспарланып отыр. Бұл туралы “Shalqar.kz” Еңбек және халықты әлеуметтік қорғау министрлігінің мәліметіне сүйене отырып хабарлайды.

120 ардагерге арнайы қолдау
Министрлік деректеріне сәйкес, 2025 жылғы 20 қаңтардағы жағдай бойынша елімізде 120 Ұлы Отан соғысы ардагері және Жеңіске үлес қосқан 42 545 азамат тұрады. Соның ішінде:
 • Қоршаудағы Ленинград тұрғындары – 67 адам,
 • Концлагерьлердің бұрынғы кәмелетке толмаған тұтқындары – 139 адам,
 • Қайтыс болған жауынгерлердің жесірлері – 2 адам,
 • Тыл еңбеккерлері – 41 594 адам.

Жергілікті атқарушы органдардың ақпараты бойынша, биыл ҰОС-тың әрбір ардагеріне 5 миллион теңгеден біржолғы көмек көрсетілмек. Бұл бастама Жеңістің 80 жылдығына орай жасалып жатқан әлеуметтік қолдаудың ауқымды шараларының бір бөлігі.

Зейнетақы мен әлеуметтік төлемдер
Министрлік мәліметінше, 2025 жылдың басынан бері ардагерлер мен мүгедектігі бар азаматтардың ай сайынғы әлеуметтік төлемдерінің мөлшері айтарлықтай жоғарылаған:
 • ҰОС қатысушылары үшін – 262 334 теңге,
 • Соғыс жарақаты мен мүгедектік салдарынан төлем алушылар үшін – 279 330 теңге.

Ардагерлерге қамқорлық – басты міндет
Министрлік хабарламасында ардагерлер мен тыл еңбеккерлеріне қолдау көрсету мемлекеттің әлеуметтік саясатының басты басымдықтарының бірі екені айтылған. Олардың өмір сүру сапасын жақсарту орталық және жергілікті деңгейде тұрақты түрде іске асып келеді.