وقۋ-اعارتۋ مينيسترى جۇلدىز سۇلەيمەنوۆا مەكتەپتەردە پاندەردى بىرىكتىرىپ وقىتۋ جونىندەگى ۇسىنىسقا قاتىستى وز پىكىرىن بىلدىردى, دەپ حابارلايدى مينيسترلىككە سىلتەمە جاساعان Shalqar.kz.

قازىرگى ۋاقىتتا اپروباتسييادان وتىپ جاتقان مەملەكەتتىك جالپىعا مىندەتتى بىلىم بەرۋ ستاندارتىنداعى پاندەردى بىرىكتىرىپ وقىتۋ جونىندەگى ماسەلەنى تالقىلاعان جۇلدىز سۇلەيمەنوۆا, پاندەردى بىرىكتىرىپ وقىتۋ جونىندەگى ۇسىنىستى قايتا قاراۋعا ازىر ەكەنىن ايتتى.

"مەملەكەت باسشىسىنىڭ تاپسىرمالارىنا سايكەس بىلىم سالاسىنداعى ەڭ وزەكتى جانە باستى مىندەت – بالالاردىڭ ساپالى بىلىم الۋ قۇقىعىن قامتاماسىز ەتۋ. پاندەردى بىرىكتىرىپ وقىتۋ جونىندەگى ۇسىنىس جان-جاقتى زەردەلەۋدى قاجەت ەتەدى دەپ ەسەپتەيمىن. بىلىم جۇيەسى تەحنولوگييالىق پروگرەسكە قادام باسقان كەزەڭدە وقۋشىلار اربىر پاندى مەكتەپتە بازالىق دەڭگەيدە مەڭگەرۋگە تيىس, سوندىقتان مينيستر رەتىندە ماقساتتارى مەن تاقىرىپتارى بولەك بۇل پاندەردىڭ ارقايسىسىن جەكە پان رەتىندە دەربەس وقىتۋدى قولدايمىن", - دەدى وقۋ-اعارتۋ مينيسترى.

ەستەرىڭىزگە سالا كەتەيىك, بۇگىندە ى.التىنسارين اتىنداعى ۇلتتىق بىلىم اكادەميياسى ازىرلەگەن جاڭا وقۋ ستاندارتى پيلوتتىق جوبا رەتىندە سىناقتان وتۋدە. وعان سايكەس الگەبرا مەن گەومەترييانى "ماتەماتيكا", حيمييا, فيزيكا, بيولوگييا پاندەرىن "جاراتىلىستانۋ عىلىمدارى", ال دۇنيەجۇزى تاريحى مەن قۇقىق نەگىزدەرىن "الەۋمەتتىك عىلىمدار" پاندەرىنە بىرىكتىرۋ كوزدەلگەن بولاتىن.

"مينيسترلىك وسكەلەڭ ۇرپاقتىڭ باسەكەگە قابىلەتتى بولىپ وسۋى ۇشىن بىلىم بەرۋ باعدارلامالارىنىڭ ەڭبەك نارىعىنىڭ تالاپتارىنا سايكەس ازىرلەۋ, بالالاردىڭ ساپالى بىلىم الۋ قۇقىعىن قامتاماسىز ەتۋ ماقساتىندا بۇل ماسەلەدە پەداگوگيكالىق قاۋىمداستىقپەن جانە بىلىم سالاسىنىڭ ساراپشىلارىمەن ەگجەي-تەگجەيلى زەردەلەۋ جۇرگىزۋگە مۇددەلى", - دەلىنگەن مينيسترلىك حابارلاماسىندا.