7 мамырда Астанадағы Тәуелсіздік алаңында Ұлы Отан соғысындағы Жеңістің 80 жылдығына арналған ауқымды әскери парад өтеді. Бұл айтулы шараға 4,5 мыңнан астам адам қатысып, көрермендер назарына тарихи әскери техникалар мен ұшақтардың әуе шоуы ұсынылады, деп хабарлайды Shalqar.kz.

Жеңіс шеруінің ерекшелігі қандай?

Қазақстан Қорғаныс министрлігінің мәліметінше, парад үш негізгі кезеңнен тұрады:
 Әскерилер маршы – тарихи және заманауи әскери бөлімдердің салтанатты шеруі;
 Танктер мен техникалар шеруі – тарихи және қазіргі заманғы әскери машиналардың көрінісі;
 Әуе шоуы – әскери ұшақтардың аспандағы көрінісі.

Ерекше сәттердің бірі – Қазақстан аумағында құрылған 23 әскери бөлім мен бригаданың жауынгерлік тулары алғаш рет парад алаңынан өтеді. Сонымен қатар, Жеңіс туының көшірмесі әйгілі Т-34 танкінде тасымалданады.

Жеңіс шеруіне қанша қаржы бөлінді?

Парадты ұйымдастыруға 2,5 млрд теңге бөлінген. Бұл қаражат жанар-жағармай, қосалқы бөлшектер, әскер қозғалысы, киім тігу және іссапар шығындарын қамтиды.

Сонымен қатар, Жеңістің 80 жылдығы қарсаңында елдегі 42 мың адамға мерейтойлық медаль табысталады. Ардагерлер мен тыл еңбеккерлеріне 5 миллион теңге көлемінде бір реттік көмек беру жоспарланған.

Бұл тарихи парад – еліміздің әскери күш-қуатын көрсететін ғана емес, өткенге тағзым етіп, бейбітшілік үшін күрескен батырларды еске алу шарасы.