Qazaqstan Sırtqı ister ministri Ermek Köşerbaev pen Europalıq odaqtıñ Sırtqı ister jäne qauipsizdik sayasatı jönindegi joğarı ökili Kaya Kallastıñ törağalığımen «Qazaqstan – Europalıq odaq» ıntımaqtastıq keñesiniñ 22-şi otırısı ötti, dep habarlaydı Shalqar.kz «QR SİM»-ne silteme jasap.

İs-şaranıñ mañızdılığı Qazaqstan men Europalıq odaq jäne onıñ müşe memleketteri arasındağı Keñeytilgen seriktestik pen ıntımaqtastıq turalı kelisimge qol qoyıluınıñ 10 jıldığına oray ötkiziluimen erekşe ayşıqtaldı.

Taraptar Astana men Bryussel' arasındağı strategiyalıq seriktestiktiñ on jıldıq nätijesin qorıtındılap, onıñ bolaşaqtağı damuı jönindegi közqarasımen bölisti.

Ekonomikalıq baylanıstar ıntımaqtastıqtıñ negizgi qozğauşı küşi bolıp qala beretini rastaldı. Europalıq odaq Qazaqstannıñ eñ iri sauda jäne investiciyalıq seriktesi märtebesin saqtap otır. 2024 jılı özara tauar aynalımı 50 mlrd AQŞ dollarına jaqındadı, al europalıq investiciyalardıñ jalpı ağını 200 mlrd AQŞ dollarına jetti. Elde europalıq qatısuı bar 4 mıñnan astam kompaniya jwmıs isteydi. Qazaq tarapı saudanı odan äri ärtaraptandıruğa dayın ekenin bildirip, otandıq auıl şaruaşılığı önimderiniñ EO narığına qol jetkizuin keñeytudiñ mañızın atap ötti.

Erekşe nazar Transkaspiy halıqaralıq kölik bağdarın («Orta däliz») damıtu mäselesine audarıldı. Ğalamdıq jetkizu tizbekteriniñ transformaciyasın eskere otırıp, taraptar bwl bağıttıñ Europa men Aziya arasındağı senimdi äri twraqtı kölik dälizi retindegi strategiyalıq mañızın rastadı. Qazaqstan bwl koridordı odan äri damıtu üşin EO jäne öñirlik seriktestermen ıntımaqtastıqtı tereñdetuge dayın ekenin jetkizdi.

Jeke bağıt retinde «jasıl» jäne cifrlıq transformaciya salasındağı özara is-qimıl talqılandı. Taraptar bwl bağıttıñ Qazaqstan ekonomikasınıñ jañğırtıluına jäne Europanıñ önerkäsiptik twraqtılığına birdey üles qosatın perspektivalı sala ekenin atap ötti.

Otırısqa qatısuşılar parlamenttik ıntımaqtastıqtıñ mañızın da atap ötip, qaraşa ayında Bryussel'de ötken «QR – EO» parlamenttik ıntımaqtastıq komitetiniñ 22-şi otırısınıñ tabıstı ötkenin joğarı bağaladı.

Adamdar arasındağı baylanıstı keñeytuge erekşe nazar audarıldı. Taraptar 2 jeltoqsanda Bryussel'de QR azamattarı üşin EO vizalıq rejimin jeñildetu jäne readmissiya turalı kelissözderdi bastaudı qwptadı.

Bwl qadam gumanitarlıq baylanıstardı nığaytuğa, studentter, ğalımdar men käsibi mamandar üşin mümkindikterdi keñeytuge, sonday-aq azamattardıñ mobil'digin arttıruğa eleuli üles qosadı.

Öñiraralıq ıntımaqtastıq twrğısınan 2025 jılğı säuirde Samarqandta ötken «Ortalıq Aziya – EO» alğaşqı sammitinde qabıldanğan tarihi şeşim erekşe atalıp ötti. Onıñ nätijesinde bwl format resmi türde strategiyalıq seriktestik deñgeyine köterildi.

Otırıs barısında delegaciya basşıları Qazaqstan men Europalıq odaqtıñ kemeldengen, ornıqtı jäne bolaşaqqa bağıttalğan seriktestik qwra alğanın atap ötti. 29 negizgi özara is-qimıl bağıtın qamtitın Keñeytilgen seriktestik pen ıntımaqtastıq turalı kelisim osı jıldar işinde öz tiimdiligi men özektiligin körsetip, ıntımaqtastıq pen özara senimdi nığaytudıñ berik negizine aynaldı.

Kezdesu soñında E.Köşerbaev pen K.Kallas sayasi dialogtı odan äri nığaytuğa, sauda men investiciyalardı damıtuğa, öñirlik özara baylanıstı arttıruğa jäne gumanitarlıq saladağı ıntımaqtastıqtı tereñdetuge beyildi ekenin rastadı.