المالىق اۋىلىندا قازاق جەمىس-كوكونىس شارۋاشىلىعى عىلىمي-زەرتتەۋ ينستيتۋتىنىڭ تالعار وڭىرلىك فيليالى بازاسىندا اوك-تەگى قازاقستان-رەسەي وزىق تەحنولوگييالار ورتالىعىنىڭ العاشقى ىرى جوباسى — «ميچۋرين باعى» اشىلدى, دەپ حابارلايدى Shalqar.kz “قر اۋىل شارۋاشىلىعى مينيسترلىگىنە” سىلتەمە جاساپ.

جوبا قر ۇلتتىق عىلىم اكادەميياسى مەن رەسەي عىلىم اكادەميياسى تاراپىنان جۇزەگە اسىرىلىپ, اگرارلىق سەكتوردىڭ عىلىمي-بىلىم بەرۋ الەۋەتىن نىعايتۋعا, وتاندىق سەلەكتسييالىق باق وسىرۋدى دامىتۋعا جانە ازىق-تۇلىك قاۋىپسىزدىگىن ارتتىرۋعا ارنالعان.
جاڭا باق عىلىمي زەرتتەۋلەردى, يننوۆاتسييالىق اگروتەحنولوگييالاردى جانە مامانداردىڭ تاجىريبەلىك دايارلىعىن بىرىكتىرەتىن بىرەگەي كوپفۋنكتسيونالدى الاڭعا اينالماق.

جوبانىڭ نەگىزگى باعىتتارى: جەمىس-جيدەك داقىلدارىنىڭ بيورەسۋرس كوللەكتسيياسى مەن گەنوفوندىن كەڭەيتۋ; پەرسپەكتيۆالى سورتتاردى زەرتتەۋ جانە بەيىمدەۋ; جاڭا سەلەكتسييالىق باعدارلامالارعا نەگىز بولاتىن بازا قۇرۋ; جوعارى ونىمدىلىككە, وسىمدىكتەردىڭ تۇراقتىلىعىنا جانە سۋ, ەنەرگييا مەن توپىراق رەسۋرستارىن ۇتىمدى پايدالانۋعا مۇمكىندىك بەرەتىن جوعارى قارقىندى تەحنولوگييالاردى ەنگىزۋ.

وسى رەتتە 3 گەكتار اۋماققا داستۇرلى جانە زاماناۋي باۋ-باقشا وندىرىسىنە ارنالعان المانىڭ سورتتارى, سونداي-اق جەمىس-جيدەك داقىلدارى قامتىلدى.
رەسەيلىك سەرىكتەستەرمەن, اتاپ ايتقاندا «سيريۋس» يننوۆاتسييالىق عىلىمي-تەحنولوگييالىق ورتالىعىمەن, «اگروپيщەپروم» عىلىمي-وندىرىستىك ورتالىعىمەن جانە ي.ۆ. ميچۋرين اتىنداعى فەدەرالدىق عىلىمي ورتالىقپەن بىرلەسىپ, قازاقستان جاعدايىندا وسىرۋگە قولايلى, جوعارى ونىمدى جانە كوممەرتسييالىق تيىمدى سورتتاردىڭ تاجىريبەلىك ۋچاسكەلەرى قالىپتاستىرىلاتىن بولادى.
ولاردىڭ قاتارىندا «پامياتي نەستەروۆا» الماسى, «نيكا» المۇرتى, «زارەچنايا راننيايا» الحورى جانە باسقا سورتتار بار.

بۇعان قوسا, المۇرت, شيە, تاتتى شيە, الحورىنىڭ بىرەگەي سەلەكتسييالىق سورتتارى, سونداي-اق جيمولوستь, قاراقات تۇرلەرى, قارلىعان, ارونييا, شىرعاناق, يرگا, بورىقاراقات جانە يتمۇرىن وتىرعىزىلاتىن بولادى.

«ميچۋرين باعى» اشىق اسپان استىنداعى شىنايى «زەرتحاناعا» اينالىپ, كوشەت تاڭداۋ مەن وتىرعىزۋ سحەمالارىن انىقتاۋدان باستاپ, ساقتاۋ, قايتا وڭدەۋ تەحنولوگييالارىنا جانە جوعارى ساپالى ونىمدى تۇتىنۋشىعا جەتكىزۋگە دەيىنگى وزىق عىلىمي شەشىمدەر تاجىريبە جۇزىندە سىناقتان وتكىزىلەتىن بولادى.