كەشە تۇركىستان وبلىسى مادەنيەت باسقارماسىنا قاراستى «ۇلى دالا ەلى» ورتالىعى 100 ملن تەڭگەگە تىكەلەي شارت جاساسۋ ارقىلى «G7 Exlusive» جشس-نە 3-7 مينۋتتىق تاريحي بەينەروليككە تاپسىرىس بەرگەنى تۋرالى اقپارات تارادى, دەپ حابارلايدى Shalqar.kz.

وندا تۇركىستان وبلىستىق مەملەكەتتىك ساتىپ الۋ باسقارماسى اتالعان جوبانى ساتىپ الۋدى اشىق كونكۋرس تاسىلىمەن ۇش مارتە ۇيىمداستىرىپ, الەۋەتتى ورىنداۋشى تابىلماعانىن العا تارتقان.

- بولىنگەن قارجىنى تيىمدى ارى ۋاقىتىلى يگەرۋ ماقساتىندا اتالعان جوبانى «مەملەكەتتىك ساتىپ الۋ تۋرالى» زاڭىنىڭ 16-بابى 3-تارماعىنا سايكەس بىر كوزدەن الۋ تاسىلىمەن 2025 جىلعى 28 قاراشادا قوسىمشا قۇن سالىعىن قوسا العاندا 100 800 000 تەڭگەگە كەلىسىمشارت جاسالىندى. تاپسىرىس بەرۋشى — تۇركىستان وبلىسى مادەنيەت باسقارماسىنا قاراستى «ۇلى دالا ەلى ورتالىعى». ورىندالۋ مەرزىمى 2025 جىلدىڭ 31 جەلتوقسانىنا دەيىن, - دەلىنگەن ۆەدومستۆو ۇسىنعان دەرەكتە.

ال بۇگىن تۇركىستان وبلىسىنىڭ اكىمى نۇرالحان قوشەروۆ اتالعان كەلىسىمشارتتىڭ جاسالۋ جاعدايلارىن جان-جاقتى تەكسەرۋ, ونىڭ ىشىندە قاجەتتى راسىمدەردىڭ ساقتالۋىن قامتاماسىز ەتۋ بويىنشا ناقتى تاپسىرما بەرگەنى بەلگىلى بولدى.

- تەكسەرۋ ناتيجەلەرى مەن الداعى قادامدار تۋرالى قوسىمشا حابارلانادى, - دەپ مالىمدەدى اكىمدىكتىڭ باسپاسوز قىزمەتىنەن.