استانادا «جىل ۆولونتەرى» حالىقارالىق سىيلىعىن تابىستاۋ راسىمى وتىپ, «يگى ىستەر مارافونى» رەسپۋبليكالىق جوباسى قورىتىندىلاندى, دەپ حابارلايدى Shalqar.kz “مادەنيەت جانە اقپارات مينيسترلىگىنىڭ” تەلەگرامم كانالىنا سىلتەمە جاساپ.

ىس-شارا حالىقارالىق ۆولونتەرلەر كۇنى اياسىندا جانە تۇراقتى دامۋ ماقساتتارىنداعى حالىقارالىق ۆولونتەرلەر جىلىنىڭ رەسمي باستالۋى قارساڭىندا ۇيىمداستىرىلدى. اتالعان جىلدى جارييالاۋ باستاماسىن قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ كوتەرگەن بولاتىن.

جىلدىڭ رەسمي اشىلۋى بۇۇ-نىڭ نьيۋ-يوركتەگى شتاب-پاتەرىندە وتەدى.

ايتا كەتەيىك, «جىل ۆولونتەرى» سىيلىعى مەملەكەت باسشىسىنىڭ باستاماسىمەن 2020 جىلدان بەرى جىل سايىن تاپسىرىلىپ كەلەدى. وسى ۋاقىتقا دەيىن 297 ۆولونتيور لاۋرەات اتاندى.

2025 جىلى سىيلىقتىڭ لاۋرەاتتارى اتانعان 46 قازاقستاندىق ۆولونتەرمەن قاتار, ازەربايجان, قىرعىزستان, رەسەي جانە تۇركييادان كەلگەن 4 ۆولونتەر ماراپاتتالدى.

ولاردىڭ بارلىعى الەۋمەتتىك ماڭىزى بار ماسەلەلەردى شەشۋگە, ۆولونتەرلىكتى دامىتۋعا جانە وسى سالاداعى حالىقارالىق ىنتىماقتاستىقتى نىعايتۋعا باعىتتالعان جوبالارى مەن باستامالارىنىڭ ناتيجەلەرىن ۇسىندى.

سونىمەن قاتار بۇگىن «يگى ىستەر مارافونى» رەسپۋبليكالىق جوباسىنىڭ قورىتىندىلارى جارييالاندى. مارافون بارىسىندا قازاقستاندىقتار 9 مىڭنان استام يگى ىس اتقاردى. بايقاۋ ناتيجەسىندە ەڭ جوعارى بەلسەندىلىك تانىتقان 20 جەڭىمپاز انىقتالدى. جالپى, جوباعا 40 مىڭعا جۋىق قازاقستاندىق قاتىستى.