قازىرگى ۋاقىتتا 156,7 مىڭ قازاقستاندىق شەتەلدە ەڭبەك ەتىپ جۇر, دەپ حابارلايدى Shalqar.kz. ولاردىڭ باسىم بولىگى, ياعني 128,8 مىڭ ادام رەسەيگە جۇمىس ىزدەپ كەتكەن. 

ال وڭتۇستىك كورەيا رەسپۋبليكاسىندا 11 مىڭ ادام ەڭبەك ەتەدى.

– وڭتۇستىك كورەيا رەسپۋبليكاسىمەن كەلىسسوزگە سايكەس جەلتوقساننان اقپان ايىنا دەيىن قر ازاماتتارىنا ەلدەن زاڭدى تۇردە شىعۋعا مۇمكىندىك بەرىلگەن. ياعني ازاماتتار ايىپپۇلسىز, دەپورتاتسيياسىز ەلگە قايتا الادى. بۇل 1 جەلتوقسانعا دەيىن كورەياعا كىرگەن ازاماتتارعا قاتىستى. بۇل تىزىمگە اۋىر قىلمىس جاساعان ادامدار كىرمەيدى. سىم اقپاراتىنا سايكەس, بۇگىنگى تاڭدا شامامەن كورەيادا 11 مىڭعا جۋىق ازامات جۇمىس ىستەپ جۇر, - دەيدى «بۇگىن LIVE» باعدارلاماسىنا بەرگەن سۇحباتىندا قر ەحاقم كوشى-قون كوميتەتىنىڭ باسقارما باسشىسى نۇرسۇلتان اسقاربەك.

كوميتەت باسشىسىنىڭ ايتۋىنشا, بۇل – وڭتۇستىك كورەيا تاراپىنىڭ باستاماسى.

– نەگىزگى ماقساتى – وندا زاڭسىز جۇرگەن قازاقستان ازاماتتارىنىڭ سانىن ازايتۋ. بۇل مۇمكىندىكتى پايدالانۋ ۇشىن جەكە باسىن انىقتايتىن قۇجاتى, وتىنىشى, اۋە بيلەتى بولسا, ەلگە ەش قيىندىقسىز كەلە الادى. ەگەر ازاماتتار تارتىپكە باعىنباي, زاڭسىز جۇرۋىن توقتاتپاسا, قازاقستان ۆاليۋتاسىمەن ەسەپتەگەندە 50 مىڭنان باستاپ ايىپپۇل تولەيدى. ول ارتۇرلى جاعدايعا بايلانىستى وزگەرە بەرەدى. ەگەر وڭتۇستىك كورەياداعى زاڭسىز جۇرگەن قازاقستاندىق ازاماتتاردىڭ سانى ازايسا, ەلىمىز ەPS جۇيەسىنە كىرەدى جانە الەمدىك ارەناداعى ەل يميدجى جوعارىلايدى, - دەيدى سپيكەر.