زاڭداعى جاڭا تۇزەتۋلەرگە بايلانىستى فونوگرامما قولدانۋ تارتىبى قالاي وزگەرەدى? بۇل سۇراققا مادەنيەت جانە اقپارات مينيسترلىگى جاۋاپ بەردى, دەپ حابارلايدى Shalqar.kz.

— ماجىلىس دەپۋتاتتارىنىڭ باستاماسىمەن كوتەرىلگەن بۇل نورما تەك داۋىس (ۆوكال) فونوگراممالارىن پايدالانۋعا تىيىم سالۋ تۋرالى بولىپ وتىرعانىن اتاپ وتەمىز. مادەني-بۇقارالىق ىس-شارالار كەزىندە 200-دەن استام كورەرمەننىڭ الدىندا ورىنداۋشىنىڭ الدىن الا جازىلعان داۋىسىمەن (ۆوكالمەن) ونەر كورسەتۋىنە جول بەرىلمەيدى. داۋىس (ۆوكال) فونوگرامماسىن پايدالانۋ تەك ارنايى بەيىمدەلمەگەن جانە ان ايتۋعا ارنالماعان ورىنداردا (يپپودرومداردا, دەمالىس ايماقتارىندا, ساياباقتاردا, الاڭداردا, كوشەلەردە) رۇقسات ەتىلەدى, ياعني اشىق الاڭداردا وتكىزۋگە بولادى. بۇل اتالعان ورىنداردىڭ جاندى داۋىستا ونەر كورسەتۋگە تەحنيكالىق تۇرعىدان بەيىمدەلمەۋىمەن جانە اۋا رايى جاعدايلارىنا بايلانىستى, - دەلىنگەن مينيسترلىكتىڭ جاۋابىندا.

سونىمەن قاتار ساپالى تەلەديدار كونتەنتىن دايىنداۋ, تەلەباعدارلامالار مەن جوبالاردى تۇسىرۋ بارىسىندا, اتاپ ايتساق كونتسەرتتىڭ تولىق جازباسىن, دىبىستىڭ ساپالى جازىلۋىن كوزدەيتىن تەلەۆيزييالىق جازبالار بارىسىندا قولدانۋعا رۇقسات بەرىلەدى. 

فونوگرامماعا ايىپپۇل مولشەرى قانداي بولماق?

— قازىرگى ۋاقىتتا ماجىلىس دەپۋتاتتارى مۋزىكالىق شىعارمالاردى ورىنداۋ كەزىندە داۋىس فونوگراممالارىن پايدالانعانى ۇشىن اكىمشىلىك جاۋاپكەرشىلىك بەلگىلەۋدى كوزدەيتىن تۇزەتۋلەردى ازىرلەپ جاتىر. ۇسىنىلعان وزگەرىستەرگە سايكەس, بىر مىڭ ايلىق ەسەپتىك كورسەتكىش مولشەرىندە ايىپپۇل كوزدەلۋى مۇمكىن. فونوگرامما پايدالانعانى ۇشىن جاۋاپكەرشىلىك Ivent-ۇيىمدار, جەكە كاسىپكەر (ارتىستىڭ ونەر كورسەتۋىن ۇيىمداستىرۋشى), ۆوكاليستەر مەن شىعارماشىلىق ۇجىمدارعا جۇكتەلەتىن بولادى. سوندىقتان تالاپتى بۇزۋ انشىلەرگە تيىمسىز بولۋ ۇشىن, ايىپپۇل مولشەرى دە جوعارى بەلگىلەنگەن, - دەپ اتالىپ وتكەن ۆەدومستۆو اقپاراتىندا.

ەسكە سالساق, بيىل قاراشا ايىندا پارلامەنت فونوگراممانى پايدالانۋدى شەكتەۋ تۋرالى زاڭدى قابىلدادى.