بۇل تۋرالى قر پرەزيدەنتى جانىنداعى ورتالىق كوممۋنيكاتسييالار قىزمەتىندە وتكەن بريفينگتە قر اشم بالىق شارۋاشىلىعى كوميتەتىنىڭ توراعاسى سەرىك سەرماعامبەتوۆ مالىمدەدى, دەپ حابارلايدى Shalqar.kz “قر اۋىل شارۋاشىلىعى مينيسترلىگىنە” سىلتەمە جاساپ.
سپيكەر 2025 جىلدىڭ 11 ايىنداعى سالانىڭ جۇمىس ناتيجەلەرىن, سونداي-اق سەكتوردى ودان ارى دامىتۋ جوسپارلارى مەن شارالارىن تانىستىردى.

2025 جىلدىڭ 11 ايىندا بالىق ونىمدەرى نارىعىنىڭ كولەمى 76,8 مىڭ توننانى قۇرادى. بۇل وتكەن جىلدىڭ سايكەس كەزەڭىمەن سالىستىرعاندا 10%-عا ارتىق (69,6 مىڭ توننا). وسى كەزەڭدە 38,5 مىڭ توننا بالىق اۋلاندى (وتكەن جىلمەن سالىستىرعاندا +10%), 12,2 مىڭ توننا بالىق وسىرىلدى (+4%).

كاسىپتىك بالىق اۋلاۋ اتىراۋ, قىزىلوردا, الماتى جانە شىعىس قازاقستان وبلىستارىندا جۇرگىزىلەدى. سالادا 700-دەن استام سۋبъەكت جۇمىس ىستەيدى, شامامەن 12 مىڭ بالىقشى ەڭبەك ەتەدى.

ەلدە حالىقارالىق جانە رەسپۋبليكالىق ماڭىزى بار 20, جەرگىلىكتى ماڭىزى بار شامامەن 3 000 سۋ ايدىنى بار. 2025 جىلدىڭ سوڭىنا دەيىن 63 مىڭ توننا كولەمىندە بالىق اۋلاۋ كۆوتاسى بولىنگەن, ونىڭ 1 قاراشاداعى جاعداي بويىنشا 38,5 مىڭ تونناسى نەمەسە 61% يگەرىلدى.

بالىقتى قايتا وڭدەۋمەن 72 كاسىپورىن اينالىسادى, ولاردىڭ جالپى قۋاتى جىلىنا 120 مىڭ تونناعا جەتەدى. سونىڭ ىشىندە 20 كاسىپورىنعا ەو ەلدەرىنە ەكسپورتتاۋعا رۇقسات بەرىلگەن.
قازاقستاننىڭ بالىق ونىمدەرى گەرمانييا, لاتۆييا, ليتۆا, نيدەرلاندى, رەسەي, قىتاي سەكىلدى 21 ەلگە ەكسپورتتالادى.

2025 جىلدىڭ 10 ايىندا 45 مىڭ توننا دايىن ونىم وڭدەلدى, بۇل وتكەن جىلدىڭ سايكەس كەزەڭىمەن سالىستىرعاندا 10 مىڭ تونناعا كوپ.
قايتا وڭدەۋدى دامىتۋ ۇشىن مەملەكەتتىك قولداۋ شارالارى قاراستىرىلعان. ماسەلەن, قايتا وڭدەۋشىلەر ۇشىن ققس-تى 70%-عا تومەندەتۋ, اينالىم قاراجاتىن تولىقتىرۋعا 5% مولشەرلەمەمەن جەڭىلدەتىلگەن كرەديت بەرۋ, ىشكى قۋاتتاردى جۇكتەۋ ماقساتىندا وڭدەلمەگەن بالىقتى ەكسپورتتاۋعا التى ايلىق تىيىم (15 اقپاننان 15 تامىزعا دەيىن).

مەملەكەت باسشىسىنىڭ تاپسىرمالارىن ورىنداۋ اياسىندا 2024 جىلعى قازاندا اۋماعى 108,6 مىڭ گا بولاتىن «كاسپيي يتبالىعى» تابيعي رەزەرۆاتى قۇرىلدى. قازىرگى تاڭدا ونىڭ اۋماعىن كەڭەيتۋ جانە ماتەريالدىق-تەحنيكالىق بازاسىن نىعايتۋ جۇمىستارى جۇرگىزىلۋدە.
كاسپييدەگى بەكىرە تۇقىمداس بالىقتاردىڭ پوپۋلياتسيياسىن قالپىنا كەلتىرۋ ۇشىن اتىراۋ بەكىرە بالىق وسىرۋ زاۋىتى جاڭعىرتىلۋدا. بۇل شاباق وندىرۋ كولەمىن 5 ملن-نان 7,5 ملن-عا دەيىن ارتتىرۋعا مۇمكىندىك بەرەدى.

بالىق شارۋاشىلىعى كوميتەتى كولەڭكەلى اينالىمدى ازايتۋ جانە زاڭسىز بالىق اۋلاۋدىڭ الدىن الۋ شارالارىن كۇشەيتىپ, اكۆاشارۋاشىلىقتى دامىتۋعا ەرەكشە نازار اۋدارىلىپ وتىر.
2021 جىلدان باستاپ اكۆاشارۋاشىلىقتى سۋبسيدييالاۋ كولەمى 7 ەسە وسىپ, 2025 جىلى 3,5 ملرد تەڭگەگە جەتتى.
شارۋاشىلىقتار سانى 4 ەسە ارتىپ, 650-گە كوبەيدى.

بالىق وسىرۋ بويىنشا تۇركىستان, الماتى, شىعىس قازاقستان, جامبىل وبلىستارى كوش باستاپ تۇر.
2021–2024 جىلدارى جالپى قۇنى 21,4 ملرد تەڭگە بولاتىن 87 جوبا ىسكە اسىرىلدى, ولاردىڭ جوبالىق قۋاتى جىلىنا 20 مىڭ توننا ونىم وندىرۋگە مۇمكىندىك بەرەدى.

2030 جىلعا دەيىن جالپى ينۆەستيتسييا كولەمى شامامەن 50 ملرد تەڭگە بولاتىن 44 ىرى جوبا پۋلىن قالىپتاستىرىلدى. ولاردى جۇزەگە اسىرۋ بالىق وسىرۋدى 16 مىڭ تونناعا, قايتا وڭدەۋدى 17 مىڭ تونناعا, جەم وندىرىسىن جىلىنا 6,7 مىڭ تونناعا دەيىن ۇلعايتۋعا مۇمكىندىك بەرەدى.