ەلوردادا قازاقستان-يران بيزنەس فورۋمى باستالدى, دەپ حابارلايدى Shalqar.kz. شاراعا 500-گە جۋىق قاتىسۋشى جينالدى جانە ولاردىڭ جۇزدەن استامى — يراندىق كاسىپكەرلەر.

فورۋم اياسىندا Kazakh Invest ۇلتتىق كومپانيياسى ىنتىماقتاستىق تۋرالى ەكى كەلىسىمگە قول قويۋدى جوسپارلاپ وتىر.

— بىرىنشى كەلىسىم — يراننىڭ Solico Group كومپانيياسىمەن جاسالادى. بۇل كومپانييا قازاقستاندا بىرنەشە جوبانى جۇزەگە اسىرۋدى جوسپارلاپ وتىر. العاشقى جوبا سۇتتى قايتا وڭدەۋ مەن ىرىمشىك جاساۋ سالاسىنا قاتىستى. قازىر الماتى وبلىسىندا 16 گەكتار اۋماقتا نىسانداردىڭ قۇرىلىسى باستالىپ كەتتى. ينۆەستيتسييا كولەمى شامامەن 100-150 ميلليون دوللارعا جەتەدى. ىرىمشىك وندىرىسى ىسكە قوسىلعان سوڭ, جوبانىڭ ەكىنشى فازاسى — بالالار تاعامىن وندىرۋ جوسپارلانىپ وتىر. Solico Group — اگروونەركاسىپ سالاسىندا جۇمىس ىستەيتىن يرانداعى ەڭ ىرى كورپوراتسييالاردىڭ بىرى, — دەدى Kazakh Invest ۇلتتىق كومپانيياسى باسقارما توراعاسىنىڭ ورىنباسارى مادييار سۇلتانبەك اگەنتتىككە بەرگەن سۇحباتىندا.

ەكىنشى كەلىسىم تاۋ-كەن مەتاللۋرگييا سالاسىنداعى يراننىڭ Kavand Nahan Zamin كومپانيياسىمەن ورناتىلماق. 

سپيكەردىڭ ايتۋىنشا, قازاقستاندا يران كاپيتالىنىڭ قاتىسۋىمەن 650-دەن استام ۇيىم تىركەلگەن. جينالعان ينۆەستيتسييالار كولەمى بۇگىندە 200 ميلليون دوللاردان اسادى. 

قازىرگى ۋاقىتتا تاراپتار جوعارى دەڭگەيدەگى كەلىسسوزدەر جۇرگىزىپ جاتىر. ونىڭ بارىسىندا ساۋدا-ەكونوميكالىق, كولىك-لوگيستيكا جانە مادەني-گۋمانيتارلىق سالالارداعى قازاق-يران ىنتىماقتاستىعىن ودان ارى نىعايتۋ ماسەلەلەرى تالقىلانباق.