Iran delegaciyası äkelgen 27 qoljazba 18 ğasırdağı qazaq tarihı men mädenietine arnalğan. Bwl turalı Aqordada Iran Islam Respublikasınıñ Prezidenti Masud Pezeşkianmen kelissözder qorıtındısına oray BAQ ökilderine arnalğan birlesken mälimdeme barısında Memleket basşısı Qasım-Jomart Toqaev ayttı, dep habarlaydı Shalqar.kz Akorda-ğa silteme jasap.

— Qazaq tilinde parsı sözderi köp. Ğalımdar tildik qorımızdağı parsı sözderiniñ ülesi 4 payız dep sanaydı eken. Olardıñ arasında astana, payda, körme, däulet, däri, därmek, aula, oraza jäne tağı basqa sözder bar. Büginde Irannıñ soltüstigindegi Gülstan provinciyasınıñ Gorgan, Bändar, Türimen jäne Kümbet qalalarında 5 mıñnan astam qazaq twradı. Firdousidiñ «Şahnaması» men onıñ keyipkerleri Twran halıqtarına da jaqın. Qazaqtıñ wlı aqını Abay Firdousi, Hafez, Sağdi siyaqtı parsı şayırlarınıñ şığarmalarımen tanıs bolğan, — dedi Prezident.

Memleket basşısı Iran delegaciyası äkelgen köne qoljazbalardıñ köşirmeleri 18 ğasırdağı qazaq tarihı men mädenietine arnalğanın ayttı.

— Wsınılğan 27 qoljazbada Qazaq handığınıñ äleumettik-ekonomikalıq ahualı, körşi eldermen qarım-qatınası, aymaqtağı bäsekelestik, Türkistannıñ sayasi-ekonomikalıq jağdayı, Resey patşalığınıñ qazaq aymaqtarı men handıqtarına qatıstı äreketteri turalı saraptamalar bar. Sonday-aq qazaq dalasında kömir, temir, mıs, qorğasın, biryuza kenişteriniñ tabılıp, olardı öndiru mäselesi sipattalğan. Öte qızıq derekter bar. Sizge köp raqmet, Prezident mırza, — dedi Qasım-Jomart Toqaev Iran Prezidentine qarata.