NASA мәліметінше, 2024 YR4 астероиды 2032 жылы Жерге соқтығысуы мүмкін. Дегенмен, бұл болжам әзірге тек 2% ықтималдыққа ие. Осыған байланысты Қытай астрономдары бақылау жұмыстарын күшейтіп, Жерге жақын ғарыш нысандарына қарсы қорғаныс жүйесін құруға кірісті, деп хабарлайды Shalqar.kz.

Қытайлық ғалымдар дүрбелеңге негіз жоқ екенін айтып, басты назарды астероидтың орбитасын нақты есептеуге аударып отыр. Егер оның шынымен қауіп төндіретіні анықталса, арнайы қорғаныс стратегиялары іске қосылмақ.

Қазір 2024 YR4 астероиды Жерге қарай 48 миллион шақырым қашықтықта қозғалып келеді. Оның диаметрі 40-90 метр аралығында, бұл оны аса қауіпті астероидтар қатарына қоспайды.

Алайда ғалымдар мұндай ғарыштық денелерді мұқият бақылап, олардың қозғалысын алдын ала болжау өте маңызды екенін айтады. Осы мақсатта Қытай «Жерге жақын астероидтарға қарсы қорғаныс жүйесін» әзірлеуге кірісті, ал әлемдік ғалымдар бірлесіп планетарлық қорғаныс мәселесі бойынша жұмыс істеуде.