Бейжің қаласындағы Қазақстан мәдениет орталығында «Қазақ – Қытай қаламгерлері» атты халықаралық әдеби конференция өтті, деп хабарлайды Shalqar.kz. Іс-шара Зейнолла Сәнік шығармашылығына арналған арнайы кітап көрмесінің ашылуымен басталды.

Қазақстан Жазушылар одағы басқармасының төрағасы Мереке Құлкенов Қазақстан мен Қытай арасындағы әдеби-мәдени байланыстың маңыздылығына тоқталды.

Ол Бейжіңде Қазақстанның алғашқы мәдениет орталығының ашылуы екі елдің стратегиялық серіктестігін нығайтуға ықпал еткенін, мәдени қатынастарды жаңа деңгейге көтергенін атап өтті. Соның ішінде қазақ және қытай әдебиеттерінің өзара дамуына жол ашатын жүйелі аударма ісін қалыптастыру қажетін айтты.

Пленарлық отырыста екі елдің жазушылары мен әдебиеттанушылары баяндама жасап, пікір алмасты. Қатысушылар Зейнолла Сәніктің шығармашылық мұрасын талқылап, Қазақстан мен Қытай арасындағы аударма мәселелерін, тәуелсіздік жылдарындағы қазақ әдебиетінің даму ерекшеліктерін және әдеби жобалар арқылы мәдени ынтымақтастықты тереңдету перспективаларын сөз етті.

Конференция барысында спикерлер қазақ-қытай әдеби байланыстарын одан әрі дамытуға қатысты ұсыныстары мен бастамаларын ортаға салды.

Сондай-ақ, Қазақстан Жазушылар одағы мен Қытай Жазушылар қауымдастығы арасындағы ынтымақтастық туралы меморандумға қол қойды. Құжат шығармашылық және кәсіби өзара іс-қимылды нығайтудағы маңызды қадам болды.

Бұдан бөлек, конференция аясында екі елдің жас қаламгерлерінің кездесуі өтті.