بەيجىڭ قالاسىنداعى قازاقستان مادەنيەت ورتالىعىندا «قازاق – قىتاي قالامگەرلەرى» اتتى حالىقارالىق ادەبي كونفەرەنتسييا وتتى, دەپ حابارلايدى Shalqar.kz. ىس-شارا زەينوللا سانىك شىعارماشىلىعىنا ارنالعان ارنايى كىتاپ كورمەسىنىڭ اشىلۋىمەن باستالدى.

قازاقستان جازۋشىلار وداعى باسقارماسىنىڭ توراعاسى مەرەكە قۇلكەنوۆ قازاقستان مەن قىتاي اراسىنداعى ادەبي-مادەني بايلانىستىڭ ماڭىزدىلىعىنا توقتالدى.

ول بەيجىڭدە قازاقستاننىڭ العاشقى مادەنيەت ورتالىعىنىڭ اشىلۋى ەكى ەلدىڭ ستراتەگييالىق سەرىكتەستىگىن نىعايتۋعا ىقپال ەتكەنىن, مادەني قاتىناستاردى جاڭا دەڭگەيگە كوتەرگەنىن اتاپ وتتى. سونىڭ ىشىندە قازاق جانە قىتاي ادەبيەتتەرىنىڭ وزارا دامۋىنا جول اشاتىن جۇيەلى اۋدارما ىسىن قالىپتاستىرۋ قاجەتىن ايتتى.

پلەنارلىق وتىرىستا ەكى ەلدىڭ جازۋشىلارى مەن ادەبيەتتانۋشىلارى بايانداما جاساپ, پىكىر الماستى. قاتىسۋشىلار زەينوللا سانىكتىڭ شىعارماشىلىق مۇراسىن تالقىلاپ, قازاقستان مەن قىتاي اراسىنداعى اۋدارما ماسەلەلەرىن, تاۋەلسىزدىك جىلدارىنداعى قازاق ادەبيەتىنىڭ دامۋ ەرەكشەلىكتەرىن جانە ادەبي جوبالار ارقىلى مادەني ىنتىماقتاستىقتى تەرەڭدەتۋ پەرسپەكتيۆالارىن سوز ەتتى.

كونفەرەنتسييا بارىسىندا سپيكەرلەر قازاق-قىتاي ادەبي بايلانىستارىن ودان ارى دامىتۋعا قاتىستى ۇسىنىستارى مەن باستامالارىن ورتاعا سالدى.

سونداي-اق, قازاقستان جازۋشىلار وداعى مەن قىتاي جازۋشىلار قاۋىمداستىعى اراسىنداعى ىنتىماقتاستىق تۋرالى مەموراندۋمعا قول قويدى. قۇجات شىعارماشىلىق جانە كاسىبي وزارا ىس-قيمىلدى نىعايتۋداعى ماڭىزدى قادام بولدى.

بۇدان بولەك, كونفەرەنتسييا اياسىندا ەكى ەلدىڭ جاس قالامگەرلەرىنىڭ كەزدەسۋى وتتى.