بۇگىندە قازاقستان جاستارىنىڭ سانى – 5 ميلليون 817 مىڭ ادامعا جەتتى.  بۇگىندە ولار ەل حالقىنىڭ ۇشتەن بىرى بولىگىن قۇرايدى. باستاماشىل, دارىندى, الەۋمەتتىك جاۋاپكەرشىلىگى جوعارى قازىرگى جاستار – ەلدىڭ ەرتەڭىن قالىپتاستىراتىن نەگىزگى بۋىن, دەپ حابارلايدى Shalqar.kz.

وسى ورايدا جىل سايىن ەڭبەكتەرى  مەملەكەتتىك دەڭگەيدە باعالانىپ جۇرگەن بەلسەندى جاستاردىڭ رولى ايرىقشا. جاستاردىڭ كوشباسشىلىعى مەن باستاماسىن قولدايتىن «تاۋەلسىزدىك ۇرپاقتارى» گرانتى مەن «دارىن» مەملەكەتتىك سىيلىعىن تاعايىنداۋعا ارنالعان كونكۋرستار داستۇرلى تۇردە وتكىزىلىپ كەلەدى.

«مەن قاشان دا قازاقستاندا جاستار ۇشىن بارلىق جاعداي جاسالعانىن ايتۋدان جالىقپايمىن. قاي باعىت, قاي سالا بولماسىن قولداۋ بىلىنەدى. گرانتتار, شاكىرتاقىلار, دامۋ مۇمكىندىكتەرى بار. ال مۇنداي نوميناتسيياعا يە بولۋ —  ۇلكەن مارتەبە. بىز وز ىسىمىزدى ماراپات كۇتپەي دە ادال اتقارۋعا دايىنبىز», – دەيدى بيىلعى «دارىن» سىيلىعىنىڭ «قوعامدىق قىزمەت» نوميناتسيياسى بويىنشا لاۋرەاتى مەرۋەرت وتەگەنوۆا.

جىل ىشىندە «تاۋەلسىزدىك ۇرپاقتارى» گرانتىنىڭ 2024 جىلعى 30 جەڭىمپازى وز جوبالارىن جۇزەگە اسىردى. ار جوباعا مەملەكەت تاراپىنان 3 ميلليون تەڭگەدەن بولىندى. ماسەلەن, اتىراۋ قالاسىنىڭ تۇرعىنى انەل ماراتوۆا داۋن سيندرومى بار بالالاردان قۇرالعان ينكليۋزيۆتى تەاتر اشتى, ال قۇرمانعازى اتىنداعى قازاق ۇلتتىق كونسەرۆاتوريياسىنىڭ ماگيسترى انەل اۋباكىروۆا ەلدەگى العاشقى ەتنو-ميۋزيكل قۇردى.

مەملەكەتتىڭ باسىم باعىتتارىنىڭ بىرى –  جاستاردى جۇمىسپەن قامتۋ جانە قولجەتىمدى تۇرعىن ۇي ماسەلەلەرى. «وتاۋ», «ناۋرىز» جانە «ناۋرىز جۇمىسكەر» جەڭىلدەتىلگەن تۇرعىن ۇي باعدارلامالارىنىڭ ارقاسىندا 5,7 مىڭنان استام جاس قازاقستاندىق باسپانالى بولدى. سونىمەن قاتار 17 وڭىردە جاس ماماندارعا ارنالعان وڭىرلىك يپوتەكالىق باعدارلامالار جەمىستى جۇزەگە اسىپ كەلەدى.

سوڭعى ۇش جىلدا مەملەكەتتىك قولداۋ جۇيەلى شارالارىنىڭ ناتيجەسىندە جاس كاسىپكەرلەر سانى 12,1% ارتتى. بۇگىندە جاستار اراسىنداعى جۇمىسسىزدىق دەڭگەيى 3,1%, بۇل – وڭىردەگى ەڭ تومەن كورسەتكىشتەردىڭ بىرى.

ەكولوگييالىق مادەنيەتتى قالىپتاستىرۋعا ارنالعان «تازا قازاقستان» جالپىۇلتتىق جوباسى دا قارقىندى دامىپ كەلەدى. جوبانى ىسكە اسىرۋدا «جاسىل ەل» جاستار ەڭبەك جاساقتارى نەگىزگى رول اتقارادى. بيىل ماۋسىمدىق جۇمىسپەن 35,9 مىڭ جاس قامتىلدى, بۇل جوسپارلى كورسەتكىشتەن 19,8% جوعارى. قاتىسۋشىلاردىڭ شامامەن 40%-ى  – اۋىل جاستارى.

سونىمەن قاتار جاستار رەسۋرستىق ورتالىقتارىنىڭ جەلىسى جەتىلدىرىلدى. قازىرگى تاڭدا ەلدە 235 ورتالىق جۇمىس ىستەيدى, ولار جاستارعا, اسىرەسە وسال ساناتتاعى ازاماتتارعا كومەك كورسەتەدى.

مەملەكەتتىك جاستار ساياساتىن ىسكە اسىرۋ اياسىندا جالپى سوماسى 750 ميلليون تەڭگە بولاتىن 6 جاڭا گرانتتىق جوبا ىسكە استى. بۇل باستامالار ناشاقورلىق, لۋدومانييا جانە قۇقىقبۇزۋشىلىقتىڭ الدىن الۋعا باعىتتالعان.

وسى گرانتتىق قولداۋ اياسىندا ەنگىزىلگەن «MERGEN» جۇيەسىنىڭ كومەگىمەن 5 مىڭنان استام ەسىرتكى دۇكەنى انىقتالىپ بۇعاتتالدى, جارناما سايتتارىنداعى 120 مىڭنان استام حابارلاندىرۋ تەكسەرىلدى.

جاستاردىڭ رەپرودۋكتيۆتى دەنساۋلىعىن قورعاۋ دا ماڭىزدى ماسەلەلەردىڭ بىرى بولىپ قالا بەرەدى. 94 جاستار دەنساۋلىق ورتالىعىنىڭ جۇمىسى ناتيجەسىندە جاسوسپىرىمدەر اراسىنداعى جۇكتىلىك دەڭگەيى 43%, ال ابورتتار سانى 30% تومەندەدى.