استىق ەكسپورتتاۋشىلار بيىلدان باستاپ جاڭا ونىمنەن جينالعان بيدايدى شەتەلگە جونەلتە الادى, دەپ حابارلايدى Shalqar.kz “قر اۋىل شارۋاشىلىعى مينيسترلىگىنە” سىلتەمە جاساپ. بۇل 2026 جىلدىڭ باسىندا كولىك شىعىندارىنىڭ بىر بولىگىن مەملەكەتتەن سۋبسيدييا رەتىندە قايتارىپ الۋعا مۇمكىندىك بەرەدى. كەلەسى جىلى استىق تاسىمالىن قولداۋعا 30 ملرد تەڭگەدەن استام قارجى بولىنەدى.

استىقتى كەيبىر نارىقتارعا جەتكىزۋ 30 كۇنگە دەيىن سوزىلادى. سوندىقتان ەكسپورتتاۋشىلارعا جونەلتۋدى الدىن الا باستاۋ ۇسىنىلادى. سۋبسيدييا الۋ ۇشىن ەڭ باستى تالاپ – استىقتىڭ 2026 جىلى ناقتى جەتكىزىلگەنىن دالەلدەيتىن قۇجاتتاردىڭ بولۋى.

2024 جىلى قازاقستاندا استىق پەن مايلى داقىلداردان وتە مول ونىم الىندى. ال ورتالىق ازييا نارىقتارىنىڭ مۇمكىندىگى شەكتەۋلى بولعاندىقتان, استىق ارتىق جينالىپ, ىشكى نارىقتا باعاعا قىسىم تۇستى. 2024 جىلدىڭ سوڭىندا جوعارى باسەكەلستىك پەن وتكىزۋدىڭ شەكتەۋلىگى سالدارىنان استىق باعاسى تومەندەدى.

وسى جاعدايدى رەتتەۋ ۇشىن ۇكىمەت استىق ەكسپورتىنداعى كولىك شىعىندارىن سۋبسيدييالاۋ باعدارلاماسىن ىسكە قوستى. ناتيجەسىندە استىق ساتىلاتىن ەلدەر كوبەيىپ, تاسىمال كولەمى ارتتى.

2025 جىلدىڭ 11 ايىندا تەمىرجول ارقىلى استىق تاسىمالى:

 • قارا تەڭىز پورتتارىنا – 2,5 ەسە,

 • رەسەيدىڭ بالتىق تەڭىزى پورتتارىنا – شامامەن 3 ەسە,

 • بالتىق ەلدەرىنە – 8 ەسە,

 • ازەربايجانعا – 5,5 ەسە,

 • يرانعا – 2 ەسە ارتتى.

ەكسپورتتىڭ ۇلعايۋى ىشكى نارىققا جاقسى اسەر ەتتى, ياعني, باعا تۇراقتالدى, ارزانعا ساتۋدىڭ (دەمپينگ) قاۋپى ازايدى, لوگيستيكا, قايتا وڭدەۋ جانە سەرۆيستىك سالالار دامىدى.

بيىل دا شارۋالار مول ونىم الدى, ارى وتكەن جىلدان قالعان استىق قورى ساقتالدى. باعدارلامانىڭ تيىمدىلىگىن ەسكەرىپ, ۇكىمەت 2026 جىلى دا ەكسپورتتاۋشىلار مەن استىق وندىرۋشىلەردى قولداۋدى جالعاستىرادى.

2025 جىلدىڭ 11 ايىندا بارلىعى 12,6 ملن توننا استىق تاسىمالداندى, بۇل وتكەن جىلمەن سالىستىرعاندا 34%-عا كوپ. ونىڭ 9,7 ملن تونناسى ەكسپورتقا شىعارىلدى.

ال 2025–2026 ماركەتينگتىك جىلدىڭ العاشقى ۇش ايىندا (قىركۇيەك–قاراشا) 4,4 ملن توننا استىق تاسىمالدانىپ, ەكسپورت 3,4 ملن تونناعا جەتتى.

2025 جىلدىڭ جەلتوقسانىندا ىشكى نارىقتاعى بيداي باعاسى 2024 جىلمەن سالىستىرعاندا 40–50%-عا جوعارى بولدى. بىر تونناعا 40 اقش دوللارى كولەمىندەگى كولىك سۋبسيديياسى شارۋالارعا تابىستى ساقتاۋعا, قازاقستاندىق بيدايدىڭ باسەكەگە قابىلەتتىلىگىن ارتتىرۋعا جانە ەۋروپا, افريكا, تاياۋ شىعىس پەن ورتالىق ازييا نارىقتارىندا ورنىن نىعايتۋعا ىقپال ەتەدى.