Prezident Teleradiokeşeniniñ Derekti kino ortalığı körermen nazarına «Quattı seriktes» derekti fil'min wsınbaq. Onda memleket tağdırındağı diplomatiya röli men Memleket basşısınıñ Japoniyağa jasağan resmi saparı tereñ taldanadı, dep habarlaydı Shalqar.kz.

Qazirgi geosayasi jağdayda diplomatiya tek kelissöz jürgizu tetigi emes, memlekettiñ twraqtı damuın qamtamasız etetin bastı qwralğa aynaldı. Osı qağidadan bastau alğan fil'm Japoniyada ötken joğarı deñgeyli kelissözderdi, sirek kezdesetin protokoldıq sätterdi jan-jaqtı qamtuğa tırısqan. 

Mäselen, Qasım-Jomart Toqaevtı Japoniya imperatorı Naruhito men Prem'er-ministr Sanae Takaiçidiñ bir künde qabıldauınan sayasi astar izdegeni bayqaladı. Bwğan qosa Japoniya tarihındağı alğaşqı äyel prem'er-ministr Sanae Takaiçidiñ konservativti äri wltşıl wstanımı kamera ob'ektivinde ayqın beynelengen.

Avtorlardıñ twjırımınşa, Prezidentti qabıldau şarasındağı qwrmet japon diplomatiyasında sirek kezdesedi jäne onı Qazaqstanğa körsetilgen erekşe işara dep tüsingen jön. Fil'mde Qazaqstan japontanuşılar odağınıñ qwrmetti törağası, diplomat Batırhan Qwrmanseyit qazaq-japon arasındağı közqarastı tolıqqandı taldauğa tırısadı.

— Japondar Qazaqstandı integraciyalıq üderisterge bastamaşı bolıp jürgen, ekonomikalıq twrğıdan alğa wmtılğan memleket dep biledi. Prezidentimizdi de älemdik deñgeydegi täjiribeli diplomat retinde joğarı bağalaydı, — deydi sarapşı.

Fil'mde Memleket basşısınıñ Birikken Wlttar Wyımı jüyesindegi köpjıldıq qızmeti eskerusiz qalmağan: Qasım-Jomart Toqaevtıñ Tokiodağı BWW universitetinde däris oquı tarihi sät retinde körsetilipti. Fil'mnen tüygenimiz, Toqaev bwl oqu ornında lekciya oqığan alğaşqı memleket basşısı atandı. 

Däristen keyin pikir bildirgen japon ğalımı, Hokkaydo universitetiniñ professorı Tomohiko Uyama Qazaqstandı halıqaralıq tärtipti qoldaytın jauaptı orta derjava retinde sipattaydı.

— Qazaqstan cifrlandıru salasında postkeñestik keñistiktegi jetekşi memleketke aynaldı. Prezident Toqaev reformalardı tabandı türde jüzege asırıp keledi. Al Japoniya men Qazaqstan arasındağı ıntımaqtastıqtı keñeytudiñ äleueti zor, — dedi professor.

Tuındıda «Ortalıq Aziya + Japoniya» dialoginiñ bastau alğan tarihi kezeñi de körinis tabadı. 2004 jılı Astanada ötken alğaşqı dialogtiñ wyımdastıruşılarınıñ biri sol kezdegi Sırtqı ister ministri Qasım-Jomart Toqaev bolğan. Mañızdı sät turalı estelik aytqan Japoniyanıñ bwrınğı sırtqı ister ministri Eriko Kavaguçi kadrğa ilikken eken.

Fil'mde sonday-aq jahandıq qauipsizdik, yadrolıq qarudıñ qaupi turalı kesek oylar qamtılğan. Prezidenttiñ qos halıqtıñ tağdırlas ekenin jäne yadrolıq qarudıñ zardabın tereñ tüsinetinin şegeley söylegeninen kördik.

— Hirosima, Nagasaki jäne Semey qasireti yadrolıq qaruğa jauapkerşilikpen qarap, wstamdılıq tanıtudıñ qanşalıqtı mañızdı ekenin eske saladı. Qazaqstan täuelsizdik alğannan keyin Semey yadrolıq poligonın jabu jäne älemdegi törtinşi yadrolıq arsenaldan bas tartu turalı tarihi şeşim qabıldadı. Bwl — bizdiñ osaldığımız emes. Kerisinşe, strategiyalıq köregendik tanıtıp, beybitşilik pen adamzat qauipsizdigin qamtamasız ettik, — dedi Prezident Toqaev.

Endi derekti fil'mniñ şarıqtau twsına toqtalayıq. Onda Qazaqstan men Japoniya arasındağı ekonomikalıq körsetkişter men investiciyalıq jobalar turalı derekter bar. Belgili bolğanday, aldağı uaqıtta Japoniyanıñ Komatsu kompaniyası elordada tehnikalardı kürdeli jöndeuge jäne qayta qalpına keltiruge arnalğan öndiristik keşen saluğa nietti.

Astanada salınatın keşenge Mitsui kompaniyası da atsalıspaq. Käsiporın keşenniñ halıqaralıq jetkizu tizbegin qalıptastıruğa, infraqwrılımdı damıtuğa, energetika men önerkäsip salaların öristetuge järdemdesedi.

Memleket basşısı Hitachi Construction Machinery prezidenti Masafumi Senzakimen kezdesude öndiristi lokalizaciyalau, cifrlandıru, «jasıl» tehnologiyalardı engizu jäne derbes kölik jüyesin qwru bağıtında mümkindikterdi paydalanu qajettigin atap ötken. Osı mälimetter arqılı memleketaralıq ıntımaqtastıq jaña deñgeyge köterilip kele jatqanı seziledi.

Derekti fil'm resmi kelissözdermen şektelmeydi. Prezidenttiñ Japoniyadağı qazaqtarmen tildesui, sumo sportında el namısın qorğap jürgen Ersin Baltağwl men dombıranı janınday süyetin japon muzıkantı Akira Takeguçimen kezdesui — tuındı arqalağan ruhani baylanıstıñ jarqın körinisi.

— Men üşin dombıra — qasietti aspap. Qazaqstanda twrudı qalauım da osı aspaptı jaqsı meñgerumen baylanıstı, — dedi Akira Takeguçi.

Otız jıldan astam uaqıt işinde Qazaqstan men Japoniya arasındağı senimdi dialog nığayıp, jaña mazmwnmen tolığıp keledi. «Quattı seriktes» derekti fil'mi osı joldıñ şejiresi retinde qazaq-japon diplomatiyasındağı salmaqtı beyneni surettey bilgen.