Өзбекстанның Дүниежүзілік сауда ұйымына (ДСҰ) мүше болуы 2026 жылы мақұлдануы мүмкін. Бұл туралы ел президентінің ДСҰ мәселелері жөніндегі арнайы өкілі Азизбек Урунов мәлімдеді, деп хабарлайды Shalqar.kz.

18-19 ақпанда өткен ДСҰ Бас кеңесінің отырысында Өзбекстан, Эфиопия және Босния-Герцеговинаның ұйымға қосылу мүмкіндігі талқыланды. Ұсынысты 26 мүше-мемлекет қарастырып, оның 16-сы ресми Ташкентті қолдады. Егер шешім мақұлданса, Өзбекстанға салық саясатын ұйым талаптарына сәйкестендіруге уақыт беріледі.

Ұлыбритания Өзбекстанға ДСҰ-ға қосылу процесінде техникалық көмек көрсететінін мәлімдеді. Бұған дейін Ташкент АҚШ және Қытаймен келіссөздерді сәтті аяқтаған.

Президент Шавкат Мирзиёевтің айтуынша, Өзбекстанның ДСҰ-ға қосылу процесі аяқталуға жақын. Егер ел ұйымға толық мүше атанса, бұл оның халықаралық саудадағы орнын нығайтып, жаңа экономикалық мүмкіндіктерге жол ашуы мүмкін.