Sauran audanı Şağa auıldıq okruginde «Veterinariya salasın cifrlandıru» pilottıq jobası jüzege asıp jatır, dep habarlaydı Shalqar.kz. Januarlardı çiptendiru jwmıstarı naurız ayında bastaladı.

Oblıstıq veterinariya basqarmasınıñ basşısı Erbwlan Jänibekovtiñ aytuınşa, januarlardı çiptendiru auıl şaruaşılığı januarların esepke alu jäne olardıñ qauipsizdigin qamtamasız etu maqsatında qolğa alınğan.

Sonday-aq atalğan joba jalğan mal basın subsidiyalauğa jol bermeydi jäne nesiege alınğan januarlardıñ körsetu faktileri joyıladı. Januarlarğa egilgen vakcinalıq is-şaralardı skaner arqılı oqıp derekqorğa jıldam engizuge mümkindik beredi.

– Maldı esepke alu men birdeylendirudiñ negizgi qwralı – sırğalandıru. Alayda täjiribe körsetkendey, sırğalar jii tüsip qaladı nemese mehanikalıq jolmen zaqımdaladı. Äsirese mal wrlığı kezinde sırğanı qwlağınan kesip tastaydı. Sonımen qatar Özbekstan bağıtına zañsız mal ötkizu faktileri de jii kezdesip otır. Osı mäselelerdiñ aldın aludıñ eñ tiimdi jolı – auıl şaruaşılığı januarların çiptendiru. Çip bir malğa tek bir ret ornatıladı jäne ol ünemi jaramdı. Arnayı skaner men planşet arqılı çip oqılğan sätte mal turalı barlıq aqparat, yağni qanday veterinariyalıq is-şaralar jürgizilgeni, vakcinaciyası, qan alu derekteri jäne t.b. birden körinedi. Bwl jüye qağazbastılıqtı tolığımen joyadı. Qazirgi kezde veterinarlar aktini birneşe ret toltırıp, audandıq jäne oblıstıq deñgeyde qayta tapsıradı. Al çiptendiru arqılı barlıq aqparat birden elektrondı bazağa engizilip, audan, oblıs jäne respublika deñgeyinde qoljetimdi boladı. Çiptendiru jwmıstarı biıl naurız ayında bastaladı, – dedi ol.

Veterinariya salasındağı kelesi jobanıñ biri – januarlarğa şağılısatın lenta tağu. Onıñ sözinşe, qazirgi tañda 5 mıñ dana şağılısatın lenta satıp alınıp, audan jäne qala deñgeyindegi jol boyında ornalasqan şaruaşılıqtarğa taratılıp jatır.

Bwl jwmıstar nätijesinde jol-kölik oqiğaların azaytıp, jol boyındağı januarlardıñ naqtı esebin jürgizu jäne mal ieleriniñ jauapkerşiligin arttıru közdelgen.

– 2025 jılı oblısta 25 jol-kölik oqiğası tirkeldi. Sonıñ saldarınan 3 adam qaza tauıp, 45 adam auır jaraqattandı. Atalğan jol apattarınıñ basım böligi tüngi uaqıtta, maldardıñ qarañğıda küre jol boyında körinbeuinen bolğan. Qazirgi tañda Türkistan-Şolaqqorğan, Türkistan-Qızılorda, Türkistan-Şımkent, sonday-aq Şımkent-Sarıağaş-Keles, Jetisay-Maqtaaral-Şardara jäne Arıs bağıtındağı iri avtojoldardıñ boyında 5 mıñğa juıq mal anıqtaldı. Mal ielerine tüsindiru jwmıstarın jürgizu arqılı osı maldardıñ moynına şağılısatın lenta tağu josparlanğan, – dedi ol.

Sonımen qatar 109 birıñğay baylanıs ortalığı veterinariya salasında iske qosılıp, auıl twrğındarı veterinar mamandardıñ qızmetine jüginu, bağalau jäne keri baylanıs beru mümkindigine ie boldı. Qazirgi künge deyin 441 ötinim tüsken. Joba ayasında aqılı qızmetterge avtomattı tölem jasau üşin QR kod ornatılğan. 109 birıñğay baylanıs ortalığın damıtu jäne JI jüyesin engizu bağıtında merdiger kompaniyamen kelisimşart jasaldı.

Veterinariya salası üşin öñirde 2025 jılı jergilikti byudjetten 1,7 mlrd teñgege 85 dezinfekciyalıq avtokölik satıp alınsa, qosımşa byudjetten 34,4 mln teñgege töl alu men önimdilik körsetkişin arttıru maqsatında 17 UDZ skaner apparatı jetkizilgen.

Biıl respublikalıq byudjetten 3,9 mlrd teñge bölinip, oblısta 107 veterinariyalıq beket, 6 veterinariyalıq stanciya jäne 21 mal öleksesin tastaytın orın salu josparlanıp otır.