«سەرگەك» ينتەللەكتۋالدى قوعامدىق جانە جول قاۋىپسىزدىك جۇيەسى كەيىنگى بىر جىلدا قازاقستاندا 10 ميلليوننان استام اكىمشىلىك ەرەجە بۇزۋ دەرەگىن تىركەدى, دەپ حابارلايدى Shalqar.kz.

ىشكى ىستەر مينيسترلىگىنىڭ رەسمي ساۋالعا بەرگەن جاۋابىندا كامەرالار جول ەرەجەسىن بۇزۋدىڭ ەڭ كوپ تارالعان تۇرلەرىن اۆتوماتتى تارتىپتە انىقتايتىنىن اتاپ وتكەن. 

ۆەدومستۆو اقپاراتىنا قاراعاندا, جولداعى قاۋىپسىزدىكتى جانە جۇرگىزۋشى تارتىبىن جاقسارتۋ ۇشىن ەل بويىنشا شامامەن 27 800 كامەرا ورناتىلعان.

- ەسەپتى كەزەڭدە وسى جۇيەلەردەن الىنعان دەرەكتەردى پايدالانا وتىرىپ, اكىمشىلىك ايىپپۇلداردى تولەۋ تۋرالى 10 ميلليوننان استام نۇسقاما شىعارىلدى», - دەلىنگەن مينيسترلىك اقپاراتىندا. 

ينتەللەكتۋالدى جۇيەلەر ينسپەكتورلاردىڭ تىكەلەي قاتىسۋىنسىز ەرەجە بۇزۋ دەرەگىن اۆتوماتتى تۇردە انىقتاۋعا مۇمكىندىك بەرەدى.

جۇرگىزۋشىلەر ايىپپۇلدارعا قانشالىقتى جيى شاعىمدانادى?

ىشكى ىستەر مينيسترلىگىنىڭ حابارلاۋىنشا, اكىمشىلىك قۇقىق بۇزۋ دەرەكتەرىن قارايتىن ورگانداردىڭ ارەكەتتەرى مەن شەشىمدەرىنە شاعىمدانۋ بەلگىلەنگەن تارتىپپەن, ياعني اكىمشىلىك قۇقىق بۇزۋشىلىق تۋرالى كودەكسىنىڭ 44 جانە 44-1 تاراۋلارىنا سايكەس جۇرگىزىلەدى.

بارلىق شاعىم قولدانىستاعى پروتسەدۋرالىق نورمالار اياسىندا جەكە قاراستىرىلادى.

ۆەدومستۆو اۆتوماتتى جۇيەدە جەكەلەگەن تەحنيكالىق اقاۋلار بولۋى مۇمكىن ەكەنىن مويىندادى. بۇل تۇرعىدا كەيدە كولىك نومىرلەرىن دۇرىس تانۋ مۇمكىن بولماي جاتادى. 

- مۇنداي جاعدايلار تەحنيكالىق سيپاتتا جانە كوپ كەزدەسپەيدى. وسىنداي ماتەريالدار بويىنشا ايىپپۇلدار جويىلادى, - دەپ ناقتىلادى ىشكى ىستەر مينيسترلىگى.

ەسكە سالساق, 2025 جىلى جازدا استانادا Sergek دروندارى سىناقتان وتىپ جاتقانى مالىم بولدى.

بىلتار قازان ايىندا «سەرگەك» بەينەباقىلاۋ جۇيەسىن اراب كومپانيياسىنا بەرۋ تۋرالى ماسەلەگە ەلوردا اكىمى جەڭىس قاسىمبەك نۇرا اۋدانىنىڭ تۇرعىندارىمەن كەزدەسۋدە تۇسىنىكتەمە بەردى.